أهلًا ابكل اللغُات انگولها
تسمع الدنيا بعرضها وطولها
اهــلًا بيكـم فــي كربـــلاء ...
١
الخير دربه
الدين حُـبه
ماكو احلى من هذا الدرب جنة بخطوتين
روح امشي
عوف كلشي
هذا الحبيب إبن الحبيب ابو علي حسين
للگاع خطوتكم نبض
بالماي بالجو بالأرض
بالطول صحنه والعرض
هلا وألف هلا
ياخير عالگاع انتشر
زوار انتم لو مطر
والله حيرتو البشر
عجيبه كربلا
الكرم عدنا يختلف عن غيرنه
احنه حتى الطير ياكل خيرنه
والطيــر زايــر فـي كـربــلاء ...
_________
٢
راح كل هم
خير مَقدم
يالجيتك مثل الهوه من ماتجي نموت
هذا موكب
بي معزب
يحچي ويه الأخرس بالاشارة اتفضل وفوت
للعين خطواتك كحل
والضيف لا ماينسأل
يا دين يتبع يا أصل
صرنه إله أهل
يحسين مو بس شعيتك
زوار كلها لحضرتك
من غير دولة اتعنتك
يا سيد الدول
حسين اسمه ابكل وطن تلگونه
والعراق انخلق لجل اعيونه
بـــاب الجنـــة فــي كـربــلاء ...
___________
٣
حسين رفعة
مــو بُـدعة
حبنا ثقافة مو خرافة من الأساطير
كون تفهم
كون تعلم
اليمشي اويه الحسين ابحياته ملك ايصير
ياناس عدنه معتقد
هيهات منعوفه ابد
خدام ونطينه وعد
مانترك الأمر
اجيال تحمل رايته
اجيال تبقه بخدمته
اجيال تحيي ازيارته
أمر بعد أمر
مبدأ الحب والتسامح دينّه
وياهو عنده حسين مثل حسينّه
حُـبنـا الـغـالـي فـي كـربـــلاء ...
___________
٤
هناك تلگه
چفوف ملگه
چفين ابو فاضل سفينة نوح يانــاس
الراد يشفه
يبوس چفه
مستشفى الأمراض العصية چفوف عبــاس
عباس ضامي بس نهر
عباس ماردله بشر
عباس احلى من الگمر
والجنة حضرته
عباس فزعة ابشدتك
عباس يگضي حاجتك
عباس كلة بغيرتك
معروفة غيرته
وماي وجهك لا تبيعه لغيره
هذا ابو الخير النعيش ابخيره
رحـمـة ونـزلـت فـي كـربـــلاء ...
____________
٥
روح زوره
شوف صوره
زينب مخيم للشرف ما لاحته النار
بعين حمره
اهناك تقره
جابر يجابر مادريت ابكربله اشصار !
[ جابر يجابر مادريت ابكربله اشصار !
من شبو النار
والحرم شاطت للمعارمة اتريد اهاليها ]
مشاي خل دمعك يصب
ام عون مكسورة گلب
وياك تمشي بالدرب
عزيزة فاطمه
وبيوم عشرين بصفر
يا روس ردت للحفر
والعين لو تبچي دهر
مايرتوي الضمه
زينبية وماتطيح الراية
واحنه وي زينب نجي مشاية
مـوكـب زيـنـب فـي كـربـــلاء ...
____________
كـلمات الشاعر : مُصطفى العِيساوي
___________
MP3
[ كُتبتْ القصيدة حصريًا لموقع دُرر العراق ]
❀|zhr|1445|❀
.
رد مع اقتباس
المشاركة الأصلية كتبت بواسطة نورانيّة
