إكِتب أسامينه يـدرب العِشكَ
بالعَـشرّة نبصم إلك مانفتركَ
بـهذا الزمن دورنه كل البشـر
ماشفنه غير حسين صاحب صدكَ
___________
١
للناس معشوكَ .. عنوان للشوكَ
محبوب للروح .. بالخيل مسحوكَ
منو شايف من سامع ميت عايش ابكل زمن
وسهامه شافنه صدره بي مضيف الحسن
للضايع للخايف صارت كربلاء الوطن
دكَ باب الحسين ويروح التعب
محد يقيم الذهب غير الذهب
دورنه صاحب مايخون الملح
ماشفنه غير حسين صاحب صدكَ
___________
٢
حبيت إنسان .. ينقاس قُرآن
عطشان لحسين .. وحسين عطشان
سالفته من احچيها تبچيله السمه والنجم
عاهدته ماعوفه حسين انطيته كلمة زلم
للودام ما أهتم هوَ لوحده عندي المهم
لو اعمى اندل بابه واوصل اله
رجليه كَبليّ اتروحله لكربله
آنـا وعيوني الما نشوفه بشر
ماشفنه غير حسين صاحب صدكَ
___________
٣
خدام لإثنين .. لـحسين وحسين
ولـ چفوف عباس .. رآيـات ماشـين
علوها راياته چف يوصيّ چف بـالدرب
نوصلـه ونزوره هاي الدنيه لو تنكَلب
شافونه عرفونه يسهلّ يمنه كلشي صعب
هاي المواكب رزق من فاطمه
وبكيف الحسين الأرض والسمه
بذاكه الزمن كربله صاحت هلا
ماشفنه غير حسين صاحب صدكَ
___________
٤
يا ناس هيهات .. عباس ما مات
بكل كَاع تلكَون .. لحسين خيمات
خيماته ما طاحت ونشوف المواكب خيم
والزاير مايتعب مادام الدرب بيّ خدم
من يطلب يتدلل كلهه اتكَله صار ونعم
شيبة بخت متحزم ابموكبه
من حلكَه حلوه اليا هله ومرحبه
وينادي هاي الدنيه كلهه چذب
ماشفنه غير حسين صاحب صدكَ
___________
٥
شهرين وياك .. وللموت وياك
أيام وسنين .. مذبوح نلكَاك
مو عَشرة لا عِشرة حبك للبشر معجزه
يظل دائم للقائم لا ماينكَطع هالعزه
يازينب لو صحنه حتى الميت انفززه
باچر يجي المهدي ويموت الظلم
وانصاره اهل الدمعه واهل اللطم
ونكَله يبن الحسن أي والحسن
ماشفنه غير حسين صاحب صدكَ
___________
كلـمات الشاعر : كرار حسين الكربلائي
__________
MP3
كُتبتْ القصيدة حصريًا لموقع دُرر العراق
.Zhr.1445
رد مع اقتباس