ابعيد الحب اجوني ايعيدوني الناس
وشالو من اجوني بأيدهم شمعه
حكَهم من اجو حسبالهم فرحان
ما يدرون كلبي وحالته ووضعه
طفيت الشموع ابجفي رغم النار
وبدل شمعات كمت انطيتهم دمعه
حيل اتفاجأو من شاهدو بالعين
من تنزل دموع اعله الجفن تنعه
وما شافو دليلي وكَامو ايونون
ومن ينحب دليلي الاخرس ايسمعه
انه مابين دمعه وحيره ظكت الموت
اونن والشمات ابموتتي موقعه
صدمه اتصير يمكن لو بشر جافاك
بس ايخون هذه شلون تتوقعه
عيد الحب فرح بس انه عندي هموم
مثل ثوب اليتيم البي الف ركَعه
شأسولف عن حسرتي بهاي الأثناء
مثل حسرة شجر من ينكَطع جذعه
مثل حسرة الكاع المالكت فلاح
لا هو الموت جاي ولالكت زرعه
احلامي انتهت والعبره جن سجين
يمر حلمي اعله عيني وطيفك ايكَطه
بيني ودمعتي قصة حياة وموت
اسدن باب جرحي ودمعتي اتشرعه
شكَد يوفي الحزن لو يلفي يبقه سنين
مو مثل الفرح من يتنهي بسرعه
عيد الهم اجه ماعندي حب فدنوب
ياكلبي الجرح هم تكَدر تجرعه ؟
الشاعر :: محمد بصري الشويلي(شاعر المودة الشويلي)
رد مع اقتباس
