السلام عليكم
قد تراودني الاحلام والذكريات عن شاعر من مدينتي ومن اعز اصدقائي وبين سجلات الماضي والحاضر كنت افتش عن ورقيات قد كتبتها وجمعتها بخط يدي ومن منهل عطاء شاعر من مدينتي التي احتوت على العشرات من امثال هذا الشاعر ولكن الطيور على اشكالها تقع !!! فانين هذا الشاعر قد لايهدأ وكان المرحوم ابو جاسب لايقرأ ولايكتب وكنت ادون له بعض الابيات الشعريه في سجلي الحافل والخالد الى هذا اليوم !!! كان المرحوم طليع المدولب صاحب الارتجاليه الشعريه والموهبه التي اغنت الادب الشعري الشعبي بالقصيده والابو ذيه وقد تغنى بشعره كثير من المطربين القدامى امثال سلمان المنكوب !! لكن الشاعر اثر فيه اسر ابنه الوحيد جاسب ابو شعلان وقد حزن عليه اشد الحزن وقبل ان ياتي ابنه البار ويعود من الاسر يوافيه الاجل المحتوم ويترك لنا ارثا خالدا قد نتنفس فيه ونتذكر تلك الايام وها انا اسجل وادون له ماتركه هذا الشاعر والصديق الوفي
ولاول مره انشر له في موقعي الخاص ومن ثم الدرر وقد كتبتها على الفيس طلبا من بعض الاخوه
الشاعر المرحوم طليع المدولب !!!
شاعر الابو ذيه الارتجاليه
شاعر من مدينة الغراف عرف الابو ذيه منذ الصبا وهام ببحوره الخلابه فتلاقفته الكتاب والمطربين انذاك اليكم مجموعه من مااخترناه لكم !!
على اهل الشهامه وشرف ويباس
ذبل عودج يروحي وهشم ويباس
يدهري من دكاتك علي ويباس
شكو عندي اشو مغضب عليه
********************
وكفت مايهزه الدفع واليار
وله جانون حدر الضلع واليار
ملو من ونيني هلي واليار
شرد من شاف نيراني سريه
************************
خلف الله نبينه والنجابه
وجميع الشرف عنده والنجابه
اكيد الفرج يمه والنجابه
نتوسل بيه دنيا واخريه
********************
شوف الدهر بيه اشعمل ويره
سحابة سيل دوم الدمع ويره
شيهمه الموش بيه الجرح ويره
الشدخ للغير وانه النار بيه
*********************
مالوم الكلب يحبابي دهاكم
تعالوا جلبوا اجروحي دهاكم
تعتب لو حمامي دهاكم
ولاجن لااعتاب عالمنيه
*****************
تعول انت علي الذات مالاك
وحسافه راح تعبك فوك مالاك
بعد عالزانيه كل عتب مالاك
ولو عفت فضله ايصير اذيه
********************
جفى مافاد بيه اصياخ واماي
ونعت بجفاه مثل الملح وماي
نحتلك مانحت لبوي واماي
بسبب لنك وفي وصاحب خويه
*********************
هله بزولك حبيبي مني انه
ومعاشرتك يصالح مني انه
شتظن تطلع خيانه مني انه
ورع شايب محبتك ذيج هيه
********************
انه رايح وهو جاي لاكن
صد ليه ودعني الكلب لاكن
شفت زوج التراجي عليه لاكن
هنه ولمعة اخدوده سويه
*********************
اه اشكد صعوبه الروح لاكت
الكلب بجفاه طاح وغده لاكات
ادك والنياح عليك لاكات
يذاك الماشفت منك رديه
*******************
اجمعن حسبات فوك الاه وداه
بكلبي ومبتهل هالجرح وداه
تره طلاع ياهل الناس وداه
يموت ويندرس حدر الوطيه
**********************
حبيبي مانظرت الجسم يمراك
اليريد يزيل عنه الالم يمراك
حرت اتبع امر ربي العرش يمراك
الاله يريد وانت شده عليه
*********************
صديجك لو تريده ابضيج يربه
شلون الذيب وي الشاة يربه
لاتربط صحيحه حول يربه
خوفك عالصحيحه تيرب هيه
**********************
جثيره اجروح كلبي من دربهن
كمت ازلف وطخطخ من دربهن
لون كالو يصاحب من دربهن
مريدنهن عواقبهن رديه
********************
جوانينك بنص الكلب ويهان
وبالك من حجي اليحجون ويهان
اليغص بالماي هذا سهل ويهان
اليغص بالريج يدرك للمنيه
*******************
وحك من باتن ابذله ولاعن
دليلي مانسه ودهم ولاعن
اله وجنه ذهب صافي ولاعن
شهابه من السما ونزلت عليه
*********************
اه يبني يماي العين ينمر
وذكرك بالدقايق علي ينمر
الكلب مت مكينه بيه ينمر
يدكن كل مايمرذجرك عليه
******************
يريم الحدر من البيد يارد
ذبل عودي ومنه الورك يارد
ياكاشف ذر نبي ايوب ياراد
لعد يعكوب يوسف رده ليه
********************
الكبر خذني يبو شعيل وناراك
وردتك بس تكعد اكبالي وناراك
طفت كل نار سهريه وناراك
صدك ماطفت للموت بيه
*********************
من يجبل رسول الترف حيه
اكضي الليل ساهر اله حيه
عسى من لامني مكروص حيه
سليله ولاتعرف الماي هيه
*****************
رد مع اقتباس