آينخلة اللبديتي بن الطفيل
عار چف عباس حدرچ ينگطع
القمر قدر منازل حتى عاد
ليس كالعرجون عائد كالطلع
مثمر تعشگه البراحي العاطشات
بي عطر حيدر بعد فرسخ يشع
ما اشتميتي عطر هاشم يفوح ؟
التراب الداسه ماگلج نبع ؟
شلون ابريچ وشهد كل النخيل
بمقتل العباس الچ اول ضلع ؟
لمي سعفچ غم سعف مابي فياي
و غم جذع ماصار للكافل درع
هزي ياطف الگمر تسقط جفوف
بس ضميرا هزي لتهزي الجذع
آيانخلة اللبديتي بن الطفيل
الكوكب بكبره يشيله بنص صبع
ليش ماسعفچ شگف عنه النبال
جا عذرتچ لو تكنطرتي ربع
چان طحتي عالاقل طيحة نخيل
بحجة العباس طبها وانوگع
عالاقل ميلي يسارا او يمين
الميل لابن ام البنين اكبر رفع
چانت اعصى الروس من تگبل عليه
مثل تكريب النخل من تنگطع
الها صوت الكربة يطلع من تطيح
وصوت ذاتچ بالفزع ماينسمع
الگاع هزها وحضرتچ حتى الجذور
ما اهتزت غيرة لا گطرت دمع
ميتة چانت كنطرة وخضرت حياء
من لزمها الكنطرة وصاحت سبع
وانتي خضرة وجان جمارچ لئيم
جنتي للشجرة الخبيثة اكبر فرع
النخل سيد الشجر بس ماعداچ
النخل من طين آدم بالاصل
و آدم لأهل الوگع يمج سجد
وانتي عيطة وخير منج ماحصل
لعلي واولاده فضل عالكائنات
وابو فاضل عالفضل صاحب فضل
كل نباتات الارض تعبد الاله
يعني تعبد الله اي تحمل عگل
اذن ماعندچ عذر لام البنين
دفني روحچ مستحة جوا الرمل
من وراچ وشفتي نصبوله الكمين
وبيدة شايل ماي لسكينة البطل
والعطاشة كبالچ اتنادي الحسين
عمنة ابوفاضل وصل لو ماوصل
بنخلة العذراء تتباهة النخيل
وانتي صرتي العار المخجل النخل
النخلة عمة ويا عمة البالطف عماچ
فزعة نص عرجون چفج ما نكل
خالد السعد
رد مع اقتباس
المشاركة الأصلية كتبت بواسطة ايليتا
