ودعتني فارگتني
وروحي ظلت بانتظارك من عفتني
-------------
بلون الليل عگبك أصبح نهاري
أحيه شلون بيهه ومظلمه داري
يبوية النوح والهم صفو خطاري
حميده، ومو حميدة صارت اخباري
عمري مظلم آ يمسلم
وصار مظلم بختيارك من عفتني
------------
يسألني ظلام الليل عن اضواك
يبويه اوَّحشه صارت دنيتي بليّاك
رحت وعيوني ظلت حايره ابفرگاك
ادور أثر عنك بويه وين الگاك
بليل همّي وحزني يمّي
وانتظر مطلع نهارك من عفتني
--------------
على دربك أناطر والدمع مسفوح
ولا ومضة أمل منك لعيني تلوح
رحت والبلسم انت وآنه كلي جروح
خَذِت بسمة شفافي وعفت اليه النوح
گلبي فاگد صرت اشاهد
بوية دار الغربة دارك من عفتني
------------
يا موطن وجودي وفرگتك غربة
الحياة بغير عطفك موحشه وصعبه
هاك اسمع دليلي اوّنته ونحبه
عگب عيناك حگه لو گضه نحبه
دمعي يجري وانت تدري
بوية يتّمني قرارك من عفتني
--------------
رحت واحنه مشينه برحلة التمحين
اعلى طول الدرب اتلفت وادير العين
وصلنه كربلة اوّافانه ناعي البين
اوقريت اخبار موتك من دموع حسين
من دمعته ومن حسرته
شفت ساعات احتضارك من عفتني
--------------
الكفيلة حسين ابد ما يشعر بيُتمه
وآنه اللي كفلني حسين ابو اليمه
لچن ساعة الفصلو راسه عن جسمه
الدهر مرتين يتّمني ابسهم همّه
رحتوا مني وباقي ونّي
بمهجتي وما تطفه نارك من عفتني
-------------
عقيل الكاظمي / بغداد
رد مع اقتباس
