ابصـدري حَچي محتـرگ .. ماينحچـي
بـعينـي دمع مختنـگ .. ما ينبچـي
روحي بجـرح
ماينشـرح
..........................
1
بليل هدعش صارت رماد اخيام وگـلوب
وجه الله وجهـه مخضب وعالوجه مگلوب
طبع الحرب بين الزلم طالب ومطلوب
لاچن بناتـك ياعلي ما الهن اذنوب
گول الزلم للوتر تطلب دمه
اشذنب الطفل بالسهم نحره انرمه
دمه اليسـح
ماينشرح
.......................
2
بطي الأرض هب ريح رحت الدّفن سلمان
سبعين جثه اليوم عندي اتريد دفان
المغني البشر من العطايه بعازة اچفان
فارس الميدان اعلى صدره انلعب ميدان
ماظل عظم بالجسد مامنفصل
ولـ هالـذبح ياعلي اشتاخذ فصل
فصل الذبح
ماينشرح
.........................
3
مصاب الذي شفته فلا ينوصف شـرحه
شحچي وكتاب الله تفصل صفحه صفحه
والريح عاصف وانتثر بالكون جرحه
شي بالحوافر شي راح اعلى رمحه
اربع فرق حاطته وماتنحصي
سيوف ونبل والحجاره والعصي
وطعن الرمح
ماينشرح
......................
4
لساني انعگد عگدة الطوگ بچف اديه
وصياحي سكته يصير من هول الرزيه
وديت طارش للنجف دمعة رقيه
عجبه الذي رد الشمس مارد عليه
لحگ عليّ ياعلي لحگ عليّ
فل الحبل من رگبتي وچفوف أديّ
بجرحي ملح
ماينشرح
..........................
5
من انسألّ اسكتّ واصكْ الناب ع الناب
نوبه السكوت ايصير ابلغ من الجواب
ابناتك يبو تراب اگعدن تالي اعلى التراب
وانشدّ على زينب زمنها اشــوده وشجـاب
ألمن بعد انتخي وين اتجـه
الماله ابو ولا اخو ماله وجـه
كسر الجنح
ماينشرح
..........................
للشاعر :- ميــرزا عادل أشكناني
Zhraa
.
MP3
رد مع اقتباس
المشاركة الأصلية كتبت بواسطة إبريم
