المشاركة الأصلية كتبت بواسطة علي الواسطي
طماطه حمس
المكونات: فد خمس طماطايات متوسطات الحجم..
لاوالله كبار ليش متوسطات لأن مينشبع منها وزيت وملح وفد أربع گرص خبز وطاوه كون معقچه ومابيها يده
طريقة العمل:
تجيب الطماطات وتغسلهن غسلآ مبرحآ وتگص راسها الفوگ وتگطعهن أقراص.. هسه يجي واحد يگول شنو أقراص
دوائر يمعود
المهم..
هالحچي وإنت تگطع بالطماطه حاط زيت بالطاوه وشاعل الطباخ العين الچبيره..
تكمل تگطيع ولتخلي عليهن ملح دير بالك.. إنتظر شويه لحد متشوف الدهن گام يطلع دخان نصي الطباخ للأخير لأن إذا عاليه النار من تذب الطماطه تگب الطاوه وتحرگ رموشك وحواجبك..
من تنصي الطباخ جيب قبق مال جدر كون شويه اصغر من الطاوه والزمه بيدك والماعون البي طماطه بالأيد الثانيه وذب الطماطه بالطاوه على كيفك ورأسآ حط القبق عليها وعلي النار..
هسه أمشي غسل إيدك مو تمسحها إبجامتك عزيزي المشاهد ميصير..
حظر صينيه وحط بيها الخبزات.. هسه عاد بكيفك تريد تجيب فلفل حار بطاسه صغيره لو تريد راس بصل حلو هم يرهم وياها المهم إنتة جيبهن ثنينهن
طبعا تسمع صوت التفرگع مال طماطه جوه القبق معليك بيها روح جيب قوري چاي وحطه عالعين الصغيره حتى يلحگ يصير وياها..
تجيب وصله واكيد فانيلتك هي مسويها وصله مال طباخ
شيل القبق وشوف شكو جوه اذا شفتها حمره بعدها عوفها وإذا شفت حافاتها ديصير بيها سواد جيب ملح ورش حسب رغبتك وارجع غطيها ونصي النار وليدي..
صب چاي بگلاص وكثر شكر وطفي الطباخ شيل الطاوه بفانيلتك
وحطها بالصينيه وشيل القبق ذبه بالسنگ أخلص منه وأخذ الصينيه وروح للهول
طريقة الأكل:
طبعآ هالحچي كون محد يمك لاجاهل ولاچبير..
أحسن لأن الجاهل يثبرك والچبير ياكل سريع ويخلصها
اول متگعد لتگعد ركبه ونص لا يابه تربع خوط الچاي إهبد راس البصل خلي يتفصخ وجيب گرصة خبز خليها بحضنك وإبدي أكل اول لگمه هاي هي فاتحة العمليه لتغمسها وتشيلها گبل لا ظل جعص بالطماطه داير مداير الطاوه واكل واللگمه الثانيه هم جعص بيها ولتشرب چاي هسه عوفه خلي يبرد..
ثالث لگمه اخذ راحتك تريد تغمس تريد تشيل طماطه وياها بصل لتنسى كل لگمه أشمرلك وراها فشگه مال بصل لو فلفلايه حاره بكيفك.. من تخلص الگرصه الاولى جيب الثانيه بحضنك واكل هالمره كل لگمتين أشرب شفطة چاي وهكذا وإستمتع وبالعافيه..
وسلامتكم
منو جاع منو اشتهى طماطة تكلاه
منو راح يكوم يكلي ويصورها
رد مع اقتباس
