غريب لوحدي بالباب...واگف وگفة المحتار...
انه الميت العايش وحدّي بالنار...
انه بلا داار...


وابشرك كلهه عبرتني..وصفيت تراب..
الجبان الخاف من ضله..
والما يسوه حته اعتاب...

عبروني ولكن ما رخص گلبي..
انه مصاحب شكد نهران...
يلتمون ويغثني حجيهم واستحي واندار...
واجيهم جية السكران..
ما يدري بحضنمن طاح...

ولا يدري يحط عينه اعله يا مصباح..

باچر تعتگ الدنيه واذكرنكم..
واحطن كل سوالفكم عله خدكم..
انه الحبكم...
انه الما يوم رخصكم..
تطفون واجي نجمه بصرايفكم...

واسولفكم واعاتبكم..
بس انتم ولا همكم..
چا وين العشگ وبيا حصيرة انزاح من عدكم...

اجذب وامسح عيوني..واكول ابچي فرح للناس..
محد شال وياي الهضم والعوز..
يطر الفجر واتعاون انه وگلبي اعله آخر كاس..

وهوه العمر حد يا باب ؟
باب ايگودني ل باب وچذب صدفو بعيني احباب..

كل ما تگرب الضلمه طفت روحي..
وكل ما تشتعل نجمه طفت روحي.
هذا انه بعدني اعشگ دفو روحي وغنه جروحي
وبعيده بعيني اساميهم ..

افز وجه الصبح متعوب..
مهموم وعبرتي تارسه الشباچ‌‌..
وضحكت انه وبچت عيني
حنين وگلبي كله اعتاب...

ولك يا موت دليني ع ثيابي ع النهران
ع الغبشه التعبر الدم عله الحيطان..
انه بلا راي...
مثل ذاك الاشراع الطاح ..
انه الثوره الغريبه بوجه كل ذباح..



حسن وصفي