هنا

[ارجع يازمان]

خطيه العايش ابهل دنيا بحساس
يضل طول العمر يكسر خواطر
.
الندسه الندسها اهناكه نداس
يحسها ابظهره اجت مثل الخناجر!!
.
المصيبه البيه هم شاعر وحساس
عندي اثنينهن بس الله ساتر!!
.
نوبات اختنك حد كطع الأنفاس
من أشم عطر الخيانه امن اليغادر!
.
عليهم خايف وخليت حراس
وخلوني ابقايا اسنيني أخاطر!
.
أسد اديونهم لو كالوا افلاس
ابنفس الساعه متصير اعله باجر
.
ما أدري واحدهم صار علاس!
يبيع* ويشتري* بيه ويتاجر!
.
كل حلفانهم باسمك يعباس
اشعجب ما صطرتك تعمي النواظر!
.
عنهم اختلف بالشتله والساس
چني ابهلزمان انسان عابر!
.
ولهذا ابسببهم شيب الراس
لان ينقهر كلبي ابهلمناظر!
.
يقهرني الافعاله افعال الارجاس
ويجي ايدوخني بحكام المنابر!
.
الاعوج يبقه اعوج هذا مقياس
متنفعه الخطوط ولا مساطر!!
.
الخاطر مصلحتهم ورده تنداس
واديهم صفكت رغم التواتر!!
.
يجيبون النوايح يم الاعراس!
وأغانيهم تجي ابنصب الجوادر!
.
همهم بس ربح داس بأثر داس
واحدهم ابهايه.. اهوايه شاطر!
.
خذو حنه وصواني وشتلة الياس
وما ينطون أبد !! مثل المقابر!!
.
الخشبه تنقهر لو شافت الفاس
اللزكت بيها وتكَطع الخواصر!!
.
عكس بعض البشر محسوبه عالناس
الجنهم تماثيل ابلا مشاعر!!
الجنهم تماثيل ابلا مشاعر!!
حسين االساعدي