شلونكم حبايب أعضاء الدرر؟
رغم معرفتي باللغة العربية الفصيحة الا انو المواضيع اللي راح اكتبها هنا راح اكتبها بالعراقي البصراوي لأن أريد اعبر عن كل اللي بداخلي بأفضل ما يمكن ومثل ما هو بالضبط بدون أي تعديل او قيود
موضوعي اليوم هو الآتي:
احيناً تشعر انو الكرة الارضية رغم كل كبرها هي ضيگه عليك
تباوع للمستقبل ما تشوف غير الضباب اللي ما واضح منه شي
تباوع للماضي تشوف لوحة مطگعه مخربطة بس ممنوع تقترب وتعدل من هاي اللوحة اي شي
واللي يقهرك اكثر انو هاي الخرابيط انت اللي خربطتها بإيدك محد غيرك شوه اللوحة مالتك
تباوع للحاظر تشوف نفسك طامس بالطين والأسوء انو تعرف انت اللي وصلت روحك لهذا المكان اما بسوء تخطيطك او بسوء استغلالك للفرص بس هم ما تكدر ترجع وتروح بغير طريق من جديد
صعبة ترضى تبقى بالطين, فتحاول تستجمع كل قوتك حتى تطلع وتتقدم للأمام وتغير مكانك
صح كلش صعبة تمشي بالطين اللي طامس بي لركبتك وصح ما عندك قوة تقاوم وصح المستقبل مجهول والدرب ما واضح بس الموضوع يستاهل
لأن بقائك بمكانك هذا معناها موتك البطيء
مهما كنت تعبان مهما كنت مهموم حتى لو ما كان عندك ذرة شعور بالحياة اطفر سوي كل اللي تكدر عليه حتى تطفر
حتى لو ما جنت تكدر تحرك غير صبع رجلك الصغير
ابدي بأي حركة المهم تبدي وما توگف يجيك يوم وتطلع بعون الله
ما تعرف شنو المقسوم
بلكي بالشارع الجاي الحياة تنتظرك!
رد مع اقتباس
