نحن من تلك البقايا..

من حطام العافه نوح اعله الجرف
من بعد اول زوال
باقي من كلشي فُتات
و شويه من خيط الصبح باقي مجال
من العدم نسمه خجوله
هبت و رف الشراع
الشرارة الاولى چانت
و ابتدى اول صراع
تحركت ذره اعله ذره
و لملمت من كل طينه لون
حاولت اجمع شتاتي
و ظل نقص بس العيون
انا ما محتاج اصلاً للعيون
چانت الالوان كلها بلون واحد
لون بارد..
لون مفعم بالظِلال
و چان بعده بجسمي خادر
لسه ما صاير خيال
و كلشي يتكون احسه
يعاني مرحلة المخاض
الهوى بحبل المشيمه
و الگمر بعده افتراض
و الوكت ظل بمكانه
لا ضوى و لا صوت چان
و القياس بلايه وحده
و المكان بلا زمان
الصعوبه..
مو مخاض و لا ولاده
الصعوبه العُظمى هيه..
شلون تتكون سُلاله
من بعد هاي الإباده
دنيا رثه ..
و الخلق بعده جديد
و كلشي بالاحساس يمشي
الشوف مرهون اعله ايد
و مو فرق عن الخلايا
ننتهي و نرجع نعيد

جهاد الياسين