اشعجب ما تستقر ياليل ! ما ثابت ومالك راي
جنت تخلص ابرمشت عين, من جانوا احبابي وياي!
هسه اشبيك من راحو! ما تكضي وتمر بهداي!
شو جنك تطالب ثار! حيل امكيف ابلواي!!!
تجيني محزم ابحسبات,,ويريدن ادموع اهواي!
وانه ادموعي بالجمرات ,, ما الهن عرف بالماي!
الك من كلبي هالابيات,,, أبوذيه ابوجع دنياي!!!!
كفنه
مل امن المسح ياليل كفنه
ادموع الغسلنه ابكفن كفنه
عليك الحمزه ابو احزامين كفنه
يليل ولا تمرنه ابكل مسيه!
ولك يا ليل
ماضل حيل,,,
عليل وعد عدوي ادواي!
.
ما أدري انقهر عالراح,,
ما أدري أنقهر عالجاي!!
سمعت ابوادم ايوافون!,,, لكن ما شفت وفاي!!
بالحل لا تكول اشلون,,هسه السكته للحجاي!
دفان الصفه مدفون,, من ذيج الاجت من هاي!!
غامض بين اليوصفون,,صفنتهم تجي ابطرواي
شاعر بل لغز مجنون,, للعقال أودي الراي!
راحوا كلهم ايضيعون!,,اذا ساروا عله مسراي
اشلون الوادم ايعرفون !! وانه الدايخ ابمعناي!!
أنه الدايخ ابمعناي!
حسين االساعدي