كان يا مكان في قديم الزمان
بيوم من الايام كانت اكو سبع غرف، كل الغرف نفس الشكل ومفتوح من بابهم شويه، ٦ غرف كان الضوه مالتهن مشتغل وغرفة ضلمة شكلها من بعيد يخوف بنص الغرف الي منورة، تحس بيها شي غريب وانك اذا دخلتلها راح تتلبس مثل ما كنت تفكر من كنت طفل وتباوع ع زاوية ضلمة..
كانت هل غرف دائما مثل ما هنه كلهن منورات الا هل غرفة، ضلامها دامس…
حاولت تتقرب من هل غرف وتكتشفهن اكثر وتشوف يا ترى شنو تخبي كل غرفة؟..
وبحكم فضولنه لاكتشاف الاشياء دائما تقربت لاول غرفة من الغرف المنورة، كل شيء بيها كان واضح بحكم الضوء القوي، غرفة عادية وحلوة مثلها مثل كل الخمس غرف البقية الا الغرفة رقم سبعة!..
الغرفة الي خفت ان تتقرب منها بس ارجع لاول جملة بتكملة كلامي " بحكم فضولنه لاكتشاف الاشياء " قررت تقرب وتشوف هل غرفة شنو بيها!.
تفتح الباب شويه شويه، ملامحها ما واضحة والظلام ماكل من تفاصيلها هواي.. بس بيها نوع من انواع السكينه الي تخليك هادئ، وبين الهدوء المريح والي يخوف قررت تدخل لهل غرفة..
تدخل لهل غرفة هدوئها يعجبك بس بنفس الوقت اي حركة او صوت مفاجئ يجفلك!.. تحس انها هادئه لكن ماكو شي بيها هادئ، التفاصيل الي بيها لازم العتمة مغطيتها وحتى تفك اي عتمة او ظلام لازم تدخل بي حتى تشوف هل تفاصيل، مجرب لمن تدخل بمكان انت جنت تشوفه ظلام بظلام من بعيد لكن لمن تكون بداخل هل بقعة تلكه نفسك دتشوف تفاصيل مكنت تكدر تشوفها، فلما تبدي تكتشف هل غرفة تنصدم!..
شكد اكو اشياء حلوة بهل غرفة!.. شلون الظلام ظالم اجمل غرفة بهل غرف وشلون بنفس الوقت تكدر تتعايش بيها بدون ضوه وهنا تحير، تروح لغرفة منورة من هل غرف لو تبقى باحلى غرفة بس مليانه ظلام ما تكدر تسوي بي شي ويحسسك دائما ان اكو شي يمشي وراك و موترك…
تحتار وتبدي تتمالخ ويه قناعتك، تريد الاحسن والضوه!.. زين شلون؟!..
عندك حل؟!..
تقريبا ما عندك حل وغالبا جفن عينك خمل وتحس تريد تغمض وترتاح بأي غرفة من هل غرف، فتقرر تختار الي لما تغمض ما تأذي عينك، تختار الغرفة الي ما بيها ضوه حتى تنام وانت واثق ان تعبك ونعسك مراح يخليك تحس بأي خوف وراح يغمرك النوم.. ولما تصحى راح تشوف ان كل الغرف منورة بحكم ضوء النهار…
فتكتشف ان الغرفة الوحيدة الي كانت مظلمة هي الغرفة الوحيدة الطبيعية بوسط كل الغرف، لانها مظلمة بالليل لخاطر ترتاح عيونك والنهار طويل وتكدر تتمتع بجمالها لما ينكشف عنها الضوه، مو كل الاشياء الي منورة هي اشياء صحية ومو كل المتشابهين صح، اختار المكان الي ترتاح بي وتحسه ملائم الك طول الوقت، لا تختار المكان الي هسه انت مرتاح بي! لان بعدين راح تندم لما تتعب بسبب سوء هل مكان ع المدار الطويل، وتذكر يمكن اليوم العتمة موجودة حتى ترتاح والوقت ما حان لحتى تجرب كل متاع هل غرفة او هل حياة…
هسه تكدر تنام لان عينك بدت توجعك.
رد مع اقتباس
