هنا

[ملكةه]

- تدري شنو اكثر شي مضوجني؟= اي كول؟!
- المضوجني مو العلاقة الي انتهت
= لعد!
- الصفنة.. شايف هاي الصفنة الي تجي وره العلاقة، تكون مؤذية بشكل مو طبيعي
تشوف كلشي من بعيد، تشوف الحقيقة الي حبك جان مغوشها عنك
= وشنو شفت؟
- شفتني زوج، ولله شبيك لتباوع هيج اصعب شي من تشوف نفسك سد خانة، امتلاء رف، ملئ فراغ واني هيج شفتني ولمن حسيت هيج استحقرت نفسي، هو شلون اني ما جنت منتبه انو اني نحبيت بوقت فراغ المقابل وشلون الاهتمام ما كان موجود غير بوقت ما كان هل شخص ما عندة شي وشلون اني كدرت اوكع بفخ انو اكون بهل مكانة، اصعب شي من تأجل كلشي لشخص هو حاطك لان كلشي متأجل!..
= يعني شلون
- يعني وقت ما الشي الي كان هو مأجلة اجة وقتة اني تلقائيا انتهى وقتي والاحقر من هذا انو وقتي ما انتهى بشكل قطعي، كان موت بطيء مثل ما تكون بمكان كلة ضلمة وكدامك شاشة بيها ضوه هذا الضوه يخفت ويرجع ينور ويرجع يخفت ويرجع ينور بس بشكل ابطئ ويرجع يخفت بشكل يتلف اعصابك
= وليش ما سديت الشاشة وبقيت بالضلمة احسن من نور هو متقطع
- هو هاي مشكلتي، اني شخص كلش صعب يتعلق بالاشياء والاشخاص يعني ممكن اموتك يلا اتعلق بيك لان وقت ما اريد اتركك راح اموت 100 مرة ع ما اكدر اتركك.. والمشكلة الاكبر انو ما اعرف اطلعك شخص مو خوش او اكول انو هل شخص اذاني، دائما ما الشخص الي يطلع من حياتي اكول اني تعرفت ع احسن صديق بالدنيا، اني تعرفت ع احسن حبيب بالدنيا، اني قابلت ناس صعب انت تقابلهم، بس الحقيقة انو اني ما تركت احد الا ووره ما صفنت شفت شكد كتلني، شكد موتني، شكد اخذ من روحي، انقهر ع روحي شكد راح منها ع ناس حتى وهمة طالعين من حياتي اكول عليهم الله جانوا احسن ناس!.. ف اي مثل مكتلك هاي الصفنة كلش صعبة، تصفع وتخليك تحس بحقارة الي صارلك.