درر العراق

majeed_k_g · 19/April/2023

مساكم الله بالخير
درر&درات
عيدكم مبارك
وتقبل الله منكم ومنا الصيام والقيام
انه على كل شيئ قدير>>>>
بالنسبة الي
الشخص النظيف النقي العفوي …
هو الشخص الي تگدر تحچيله عن أي شغله تخصك من غير متكون قلق أنه يفهمك غلط ، ولاتكون خايف منه يستكثر عليك النعمه ، شخص گلبه طيب ونظيف وراح يفرح لمن يشوفك فعلاً سعيد ومرتاح ، وراح يوگف وياك بوقت الشده ، وراح ينصحك بللي يشوفه بي صالح الك ، وراح تاخذ منه النصيحه وأنت مطمئن وتكون على يقين بأنه نصيحته ماكو وراها لاشعور بالغيره ولا مصلحه ، شخص راح يتنازل حتى يسعدك ومراح يحس أنه سوه فضل عليك ، شخص لمن تختلف وياه راح يعبر لأن شاريك وميحب يفرط بيك ، وراح يكبرك گدام الناس ويفتخر بيك ، وراح يكون رايد بأنه صورتك تكون دائماً حلوه وبعمره ميقلل منك گدام أحد ، شخص مايحب يزعلك ، ولو أنت زعلته راح يدور على أي عذر حتى ميزعل منك.
صاحبوا الناس النظيفه ، لا تروحون أدورون على ناس گلوبها قاسيه و يمشي وياك من اجل مصلحة و أفكارها ملوثه وتعرفوهم وترجعون وتگولون الناس صايره سيئه ، أنت اللي تنگي الناس الغلط ، الصاحب ساحب ، شوف صاحبك ليوين سحبك ، وأنت راح تعرف بأنه اللي بحياتك ناس نظيفه لو ناس متتعاشر !!!
مع كثرة الأشياء المُغرية من حولنا ، ماكو أحد مُبهر بالنسبة الي ، المُبهر الوحيد هو اللي أتعلم منه شيء جديد ، جميل القلب والروح ، المُشجع الداعم ، المُعطاء ، المُحب ، الصادق ، الطيب ، النقي ، الوفي ، الذكي ، غير هيج لتگلي أنت أبن منو ، وشگد راتبك ، وشنو تلبس ماركات ، يهمني شگد أكو داخل گلبك بذور خير ، ميهمني شنو منصبك بالحياة ، هذا شيء يخصك أنت ، ويسعدك أنت ، وممكن يحسسك بالأنبهار ، وهذا الشيء مو غلط إبداً ، بس أني كأنسان اللي يهمني هو الأسلوب الراقي ، والمعاملة المُحترمة ، والتقدير ، وحسن العشرة ، والتفاهم ، غير هاي الأشياء متضيف اللي أي شيء ، لأن شهادتك لبسك فلوسك كلها متنفعني ، اللي ينفعني بعلاقتي بيك هو حُسن خلقك وبس.
وسلامتكم
درر&درات
M.K.G