ما اريد ارد بالمِثل … اتحبّ وأحب غيرك
ظليت باللا وعي … بمچاننّا اتنطرك
واشلون بيّه صرت … يم كلشي أتذكرك
لمن خذاني العطش … وداني لصورّك .
ردّ وعلي العذر … لو خفت تقصيرك
اشما تزغر انت وطن … عش انت يم طيرك
ما اريد ارد بالمِثل … اتحبّ وأحب غيرك
مو هيچ يابو الگلب … يابو اليلچمنّه
كبّرني ذاك العشگ … زغران ارد منه ؟
اتطفّي الصبح مو بعد …عصفوري ما غنّى!!!
اتراويني حرية بس … اتبيعني القيدي
اچفوفك الرجفت خجل … بـ اول مواعيدي
اتوكّحَت من وادَعَت … عرفت تعت ايدي
گتلك احبهن رغم … تاذيني چلماتك
يا ريح يرهب سكونك … زِدها هوياتك
إشراع روحي صفن … يصحى اعله خفگاتك
ما أعقِل اتغيّرِت …. وعقلك ابجهلك تاه
ضايع عشگنا القوي … وي الحچي الما ردناه
أبچي واريدك حضن … وتجيسني وي الـ آه
وياك گلبي وَهَج … ويضوي من تضحك
حط ايدك اعله الگلب … استورح ألم جرحك
وشيل ايدك ابسرعة لا … نار الجفا اتلفحك
ميوگفه عزم الصبر … دمعي البفگدك هل
گلي اشيوگفه بعد … الينزل رَكِض من تل
الأصعب علي مَشْيتك …بس عندك اسهل حل
مو مثلي انت ابد … راكع عليك الضيم
اعيونك غفت للصبح … وعيني ابسهرها اتهيم
لو عيني رادت بچي … تتنخّى كل الغيم
حسبة اشتهيتك ولك … تنضاف وي همي
منك أناطر فرج … ومَحْلَى يفض غمّي
بالظلمة سيفك يجي … ويلمع عليه دمي
لو صاك اعله البعد … گلبك ، وابد ما ذاب
يختلف گلبي أنَا … ويگلك اشما خاب
الهسه مفتوح الك … طلاقتين الباب
حسين سعد
رد مع اقتباس