((بسك يازمن))
يالرايد تشل أجروحي بطل عاد!!
جرحي امنالجدم للراس طوله!!
... شيفيدك تشل وجروحي تنزف نار؟؟
وياخيط اليخيط نار مشعولة؟؟
أذا هم وقهر والحزن عايش بي!!
وبيبان الفرح البكَلبي مقفولة!!
ولأن جف الدهر لاويني من أصباي!!
وروحي امنالزغر لليوم معلولة؟؟
أبات بحسرتي وأتوسد أعلة الضيم!!
جزه طور الشباب أحلامي مجتولة!!
انفرد بيهّ الوكت حطاهن أحساب!
مثل ذيب انفردلة بشاة مشلولة!!
يرميني بسهم وسهامه كلهن نار!!
مدرع كل وكت وسيوفه مسلولة!!
وأذا تسأل عليّ..عنواني الأحزان!!
وعلى جروف الصبر آمالي مشتولة!!
لكن يالتشل..مابعت نفسي بيوم!!
ومن خيط الشرف قمصاني مغزولة!!
أذا جرحي كبر؟؟ برموشي أخيط بي!!
ولا اشكي البشر جرحي ولا كَولة!!
علمت النفس تصبر على الضيج..
ومو كلشي التريدة..لازم اتنولة!!
*********************
رد مع اقتباس
