المصيبة الطوس چانت تكتب وتقره
تحزمنا وكطعنا الماي بلكي اتموت
وحفرنا وبگنا جذر الجانت مخضره
وترسنا الحب رمل والماي بديناه
المصيبة الطوس چانت تكتب وتقره
وكتبن للنهر ممنوع تطي الماي
ووكفنا اعله الجرف من هسه للعشره
وخفنا من المحابس خاف بيهن بوگ
وعفنا شگد اصابع تبچي عالشذره
وسحبنا اعله الحمامه اقسام والطابوگ
وگلبنا اخدودنا من البوسه للسطره
وحرگنا العش عليها وگنا سبع أرواح
لحد ماتفلت اعله اوجوهنا الشجره
صعدنا اعله الطفو ودخان غطة الرأس
ورجعنا أطراف شارب صفره والصفره
وتنادسنا وعزمنا الراعي عالموجود
وزفينا الغنم والذيب للسفره
وشردنا السنابل من اجه الحاصود
وزعلنا اعله المگص چي ماثلم شعره
واطينا الفتگ والخيط للخياط
وگلنا الكاتبه الله ايصير عالابره
الزين البينا گام ايبوگ كحل العين
ودكينا ورگصنا ابوجهه وبضهره
دحطونا ابحرب وانشوف ياهو الزير
وعلي انذب الدرع والسيف عالمهره
هذولة احنه الصدگ والعدكم ايجذبون
انسولف عالفقر بس احنه مو فقره
لا بينا اليبيع اهدومة وكت العوز
ولابينا الحكيم الوصل الفكره
ولابينا اليگوم ابغير كظة گاع
ولابينا الجبير ابعقله وبعمره
وبعد لاتطي زين الزين مامريود
وجلد كون الضمير ايصير مو ستره
كمال الصيفي
رد مع اقتباس