مر صوتك من الماضي
وحنينه اشتعل عالشباج

عبرت المستحه وعاتبتك بسكته

كل دمعه تبات الليل برموشي وراها انته
كل لجمه تفززني من اريد اغفى وجعهه انتَ

يروحي العشگ مثل الموت هم ماينعرف وكته
وتتزاحم أفكاري طيور عطشانه
وتغرگ غرفتي بأحلام ماتنگال

واشب بين الظلام وتعب عمري هلال
واسافر والحزن ماينتهي بموال
اكابر لو طفت روحي وافز من الظلام أخيال

واضيع وعطرك يلمني ندى عالياس
بلا وجهك حزين الكأس
تبجي واشتري الدمعات
عينك بالتعب تنباس

واكلك ياوجع روحي

ضوه ولايه بعيده الفرح ماينجاس
يالعينك نبع وفياي
اجيتك خايف من الناس

اجيتك والشته برمشي عمر ذبلان
آنه اشتعل من ابجي
الحزن دون الدمع دخان
تبعد والنفس يبعد حلم شاطي بوجه غرگان

اسافر بالدمع واطوي المسافات
وتمر صورِتَك تدفه بعيني وتبات
ألم حزني واهيم بوكت الغروب
أدور عالفرح مثل الحمامات

تاخذني الدروب التشرب الضويات
ويصفيني الحزن والتم واشوفك جاي
ورذاذ التعب يحرگني وتمر نسمة برد بفياي
ولك ياضحكه عذريه توديني لبياض صباي
واطش كل الألوان وارجع بلا لون مثل الماي

دامك عايش بروحي
ادورك وين وانتَ وياي







مصطفى الخزاعي