الضمير!_حسين الساعدي
نشف دجله وبقه دمعي
صافي ابكل وكت يجري!
وعشت
مابين اليغلسون
فزعه امعشعشه ابفكري!
وبقيت امناطر
الياريت
كوه امصبر ابصبري!
وبعدني لو شفت سجين ,, أخافن توصل الظهري!
ما عاتبت الجويدات
المسويهن ابعمري!!
انه امدبر الهم الاعذار,,
وحتى اليدري
أكولن عنه ما يدري!
والحاير بامرهم دوم,,, أكولن لو دروا
جا حاروا ابأمري!
مكسور واصيح ابصرخة المكسور
الأخرس سمعني وهمه معذورين , ما سمعوني أظن وامصدك ابعذري!
ومن مروا عليه وجانوا ايضحكون!
أظن ما شافوا وداسو عله كسري!
همه الناس شعليهم؟
هو الضيم كاصدني ويندلني واجه ابكتري!
هيه الناس سولتها
تحب اتسولف الاسرار,,
وانه ياهو يضحكلي رحت يمه وبحت سري!
وحتى ساري ليش ايلوم,, ريمه وعايف الجدري!!
ما اخذت ابنصيحتهم
اشكثر نصحوني ابزغري!
كالولي اشتري ولتبيع,, أبد ما يخسر اليشري!
ولا تحجي الحقيقه ابيوم!
اذا بالصبح دوامك ,, كول اداوم الضهري!
واذا تعشك عشك جذاب
ميفيد الهوى العذري!
وترى الطيبه التغر الناس!,,هاي الدنيا ما تغري!!
وكالولي الفقير انساه
اذا الله يحبه انطاه!
شعليك انته بالفِكري!!
وكالولي اذا طخوك ,, صيح ابصوت,, يابويه انكسر ظهري!
حتى الفصل راح ايزيد,, وشما أطلب الكل تاخذ بأمري!
لو ماشي ابنصيحتهم
جاء يمكن بدال الكوخ ,,
هسه احسن قصر عندي وأباهي الوادم ابقصري!
بس يبقى الضمير اشلون!
خاف ايموت!!
وقبره املاصق القبري!
وتلوحه حرارة نار,, من ناري وذنب عمري!
وضميري انه اعرفه ابخيت , وخاف الذمه ما يبري!
الماعنده ضمير اشلون!
هم انكول هذا انسان!! لو ,,, يا اسم!!!
ما ندري!!!
وحق من نجى يونس من خبايا الحوت
لا ميموت
ما اخلي الضمير ايموت ,, هو ايعيش وانه الينمحي ذكري!
هو ايعيش وانه الينمحي ذكري
حسين االساعدي
رد مع اقتباس
المشاركة الأصلية كتبت بواسطة هـآئِـم ۦٰ
