سبعين شمه بركبتك
اكبر غشيم بكلمه جنت اقتنع
و يقنعني لأعمه لو حلف بالنظر
هسه انه اسمي يصير ضيجة خلك
اعتب عليمن كله صوچ القدر
چذبه اربعينك ماكو مثلك حقد
يم السواجي يذيع صيت النهر
جرحك چبير و اكبر من الفرح
وبعكس جرحك حيل حبك زغر
ميت احساسك وانه ميتلي ابو
كفكف ادموعك مايردك عذر
زتيت روحك من ادي للدرب
يموت الورد مرتين من ينثر
جديت غيري وجنت يمك وطن
ها مالكيت احباب جوه الجسر
تيهني طيفك لمن مرني بصبح
ليهسه طايش كلي يمته استقر
طبيت كلبي ومثل طبت سهم
اوصف حضنتك چن حبل بالنحر
سديت ادينك لچن سدة چفن
تهت بضلامك ياسواد الكبر
جنت بمزاجك افتره وانضنك
هسه بمزاجي اتغربت تستقر
عطشان اجيتك شككت جربتك
من غركاني الليل تركض بحر
جنت اعتنيلك كبل هسه اختلف
اخطاء ميت ابد ما تنذكر
شاجور حلكك ذنب شابك ذنب
تلكيت صوتك بلكفه وبالصدر
يرخيص ربعك خال كلبك وقف
وبزود اديهم ترس طولك زفر
سبعين شمه بركبتك عاينت
بلله احلفك ركبه؟ شيشة عطر؟
ولكيت بيك اثار جانت نقش
وحروف جانت ماكو منها بمصر
طبعات اصابع ترس طول الجسم
والوان چانن لو زرك لو حمر
انطيك كلبي تكول ها يالصلف
ماريد كلبك عمي ردلي العمر
موسم خريف بكلبي طاح الورق
من دون لونه ولا نفع بلشجر
افرح بجيتك واقتنع بالنقص
جيت ابن مصيوب رجلي بتر
تقارني بيمن؟ بيك خايب صدك؟
اني البدايه و انته نقطة سطر
من العطش للماي چان الفرق
تحب يشترونك وانه احب الستر
يل انته كلبك حفظ صوت الجمع
والكلبه صافي يستلذ بالنفر
ذبلان وجهي وترس لونه الوفه
والوان وجهك لو غدر لو غدر
كون بمحطه تعيش طول الوكت
ليهسه اعرفك صدك مدمن سفر
تعبني فجرك يحب طاري الدمع
وكفيت دمعي وعزبيت الفجر
انطيت عمري وكلت دفعة بله
تمنيت عمري يصير دفعة مهر
سهله وجكاره وصفكة ايد وندم
الخسر عمره بروحتك ينتصر
ابراهيم الشمري
رد مع اقتباس
