أمس ورثنه أسامينا..
مَلّت مشتكاتي وملّت الدنيا
مَلّت والگلوب الصلفة ما تنذم
بشوف وجوهكم شفت النهر عطشان
واجيت من الليالي اتّوهدَن بخوفي
خاف تغثكم اغنية وتتعب عيونكم حلوة
تغرّب وجوهكم والروح من تعطش ماتدري السراب اوهام

جزه بيه العمر حسبات
وسِكت آخر حچي بالروح..
وادري انه السكوت يثلم عيوني ويبوگ دموعها ويخمد
بس مارخص عتابي !
عشگ چذاب هاي الناس
امس ورثنه اسامينه
اشتعلت والارواح التحن ما تخمد
بيا سرگي اسد هالباب؟
شجاها النار ، ما چوّت ضمايركم !
زعلي يچوّي بضلوعي
وما مديتوا اصابعكم سواجي تلوحني واطفى

هذني سنينكم چذبه
سراب يّوهِم عيوني
الحلم مصلوب بعيوني
والسكتة سگُم ويلوچ بضلوعي
تشضى الغيض البصدري
والنار الـسرّت بيه طفت بيه
بردت چيلتي بگلبي
وصحه من الوهم گلبي
حمام أبيض

بعد ما اعاتب بنادم
ولا اگل للمزن ساگي التربّ برحي
كفّت والمزن نشفت
اندارت چِلة بوريدي وبرد گلبي
طالّت حيرتي وي الناس
انعدم ذاك الفطير
الماله حظ بالناس
اليطش روحه عطر بالريح ويتيِّه بـ أغانيكم
مات الطير الـ بصدري
وبرد ملگاي ذاك الحار
اليدفّي معانيكم

هذا آخر تعب ينعگد برسومي
هذا آخر سفر بي انه مو جنّاز
مَلّن مني شوغاتي وصلّني صلاة الموت
هذا آخر حمل مطروح
وهذا آخر حزن بيه
ونعشه يصير جوه الروح








حمزة آل جبور