يالمالك جذر لاتزعل ويالريح خافنك ابهوية وتنشلع سكته
طيح عله الهوه وحب ايده من يختاض خاوي انته وبعد مابيك كل عته
علي تضحك يخايب وانه علو الغيم على ادموع الفرح هم تضحك النكته
يبو جناح الشمع متعلي وين اتريد تدك باب الشمس جنك غشيم انته
يبو سنون الخشب لاتعض جف النار طفه سنين الخشب لو هفتاه وكته
يبو زنود الرمل لا تلاوي زند السيل عناكيد الصخر كبلك غدن تحته
على الماي الضحل يتونس التمساح ويفرح بالوحل لمن يمد خشته
وعلى موت الشمس يتنومس الخفاش وعلى الهندس اهدومه عيب ماخذته
اطميعي الاخطبوط وعنده ميت اذراع لجن وكت المزامط ماله جف فلته
المبرد صح خشن وناعمه خدود السيف لجن ياهو الركاب انشكلت ابذمته
يبو درزن اوجوه استهلكن بالسوم وعلى باب الخجل اخر وجه عفته
بعد مالك اعيون وتنكسر باللوم ولا عندك وجه حته اتعرك كصته
صحيح انته ضخم بس مو ضخامة روح ضخامة كركدن بلوة ابتلى ابجثته
الكمكم صح جبير ودلته لاذت بيه لجن غصبن يدنك راسه الدلته
صحيح السيسبان ايلوذ بيه الياس لجن ياهو الصواني العرس عزمته
وصحيح الاثل عالي وفيه فوك التين لجن ياهو الجفوف اتوسدت سلته
وصحيح الجوري نابت يمه الصفصاف لجن ياهو الخشوم اتعنت الشمته
دخان المزابل يطم عين الكون لجن عود البخور الحلفو ابخته
ولد العامري ارهة امن ابو الحسنين لجن ياهو اليلوذ المذنب ابكبته
وياهو الضربته اتعادل الصوبين وياهو اعله الصراط ايعبر ابذمته
الفراش ايطير مفرد والجراد اسراب لجن ياهو الحدايق تحتفي ابلمته
فوك امن الخشم متعلي عرش العين لجن تصرخ دمع لو سمعت ابطكته
مترهي الجبل بس ماتعافه بيوم ولاشالت خشمهة اعله السفح قمته
لتغرك سكتي كون خلكي ايطول البحر يكتل ابصوته ويرهب ابصمته
وليغرك مجانك كون عالي اتصير شما يعله النخل ينشف كبل وكته
ولتغرك زنودك كون مفتولات ابو فاضل سحكهة ابلا زند تحته
ولتغرك حرثتك كون سهلة اتصير العلاس ابن عمي الماحفظ عمته
ابن عمي صدك لاجنه خاله الذيب اذا ذيب ابن خال اشترجه ببن اخته
علي دله الحرامي وجابه نص الليل اجه وياه ايتختل نمت كل ضنته
على الخيبه ايتشلبه ضنته واطي السور وحسباله يحوف ويترس الشمته
ويه اول جدم صحت انه ياهم ذول وي لمضت سمرهن من لهز صبته
استخطيت ابن عمي وادري بيه علاس محد كالي ابعين الظهر شفته
لا تعتب يكلبي ولاتجثر اللوم كلمن طينته وكلمن لبن درته
مر يوم الشبح متعني من ابعيد وانته ابسهم حقدك من بعد صبته
صبته بلا عرف وبلا عداوه وياك ولمن ما كرب لن الشبح انته
ياعدوة مرض تنتشر مثل الريح حته انته ابد ما سلم من انته
حته انته ابد ما سلم من انته
.................................................. ..
للمبدع سعد محمد الحسن
رد مع اقتباس
عاشت ايدج وردة