السلام عليكم .
قبل ايام صار خلاف بيني وبين خالي ، والخلاف تطور الى حد وصل الى المحاكم والدعاوى القضائية.
اجاني تبليغ لازم احضر للمحكمة باليوم الفلاني .
وفعلا رحت للمحكمة ، ولأن ماعندي وقت للمراجعات والمرافعات
ووضعي الصحي ميساعد ، قررت اوكل محامي وهو يتولى زمام الأمور ، ويترافع نيابة عني .
هسه هذا الحجي الحجيته فوك انسوا وركزولي منا.
وانا امشي برواق المحكمة واريد اتوجه لغرفة المحامين
لمحت بطرف عيني بنت جميلة شكلها وهيئتها توحي بأنها محامية .
طبعاً هاي المحامية بعدها شابة بس مو بنت ياجماعة
بالله تگول زبدة
جسم رشاقة طول ابتسامة تهد الحيل
عيون مخيفة
ولهالسبب نسيت المرافعة والدعوى وظليت بس اباوع عليها
من شافتني مركز عليها ابتسمت كاشارة ترحيب .
جان اروح عليها وسلمت ،ردت السلام وگالت تفضل
گلت حضرتك محامية ، كالت نعم تفضل
شرحتلها القضية ووافقت تترافع نيابة عني .
أخذت رقمها واخذت رقمي ووكلتها بدون مانتفاوض ع الاتعاب .
طبعاً انا استغليت الفرصة وكل نص ساعة اخابرها.
عفت دوامي وگابلت المحكمة وتمنيت الدعوة ماتخلص ، وانا كلما اشوفها
اسولف وياها واتحرش بيها واستفزها
وكنت استغل فترات استراحتها بين المرافعات حتى اسولف وياها .
المهم ، تطورت العلاقة خلال يومين وتجاوزت حدود القضية
وصرت اتحرش بيها واتغزل واسمعها كلام حلو ولطيف
وهي تضحك ، جان تنزع الكفوف وتطلع اصبعها وتشوفني الحلقة
وگالت والحمزة مخطوبة
موفقي اويلي
بلوكه وشامريها على راسي من فوك السطح
شافتني انعقجت كالت ان شاء الله ربي يعوضك الاحسن
كلتلها هو وين بعد اكو احسن
هالمخلوقات اللطيفة غير متوفرة في بلدي
اذا اريد ادور وين الكه هيج مرمر
هي تضحك
وكالت بنات الحلال كثار
انا كلت بس الحلوات قليلات
احسها بيها مجال للسوالف وكذا .
المهم ، الناس جاي تتوسط تريد تحل المشكلة حل سلمي
وبالتراضي ، وانا متمسك بالدعوة
وجان تسألني عن سبب تمسكي بالدعوة
گلتلها اذا انتهت الدعوة بعد ما اگدر اسولف وياچ
گالت وعد بس وافق بالرضا والصلح
ويومية تعال للمحكمة من اكمل مرافعات نظل نسولف لمن تمل .
وبالنهاية اضطريت اقبل بالحلول السلمية
وتجرعت الصلح كتجرع السم الزعاف .
وانتهت الدعوة ، وانتهت وياها احلامي .
وانقتلت طموحاتي وآمالي
وبقيت عايش على امل ان ادخل في مشكلة ثانية
ويشتكون عليه من جديد، وارجع اوكلها مرة ثانية.
وتعيشون وتسلمون .
رد مع اقتباس
المشاركة الأصلية كتبت بواسطة علي الواسطي
