ها نبلش جولة ثانية مادام بعدچ بيچ حيل ام عبوسي؟
ها نبلش جولة ثانية مادام بعدچ بيچ حيل ام عبوسي؟
تلكاهه ما سامعه باسمهنالمشاركة الأصلية كتبت بواسطة رجل المستَحيل
وين رايحه..؟
لحد الان ما جبتيلي طريقة المسموطة والمكشت والتثخانه والمعلوكَه
والله تعلكك فلقه
لا شلون هاي أكلات فلكلورية شعبية ماكو واحد بصراوي ما يعرفها..
هيه شنو سمجه يابسه ويحطوهن بالمركه وكان •اللّـہ في حب المحسنين
- شعجب اختاريتي قسم اللغة العربية بالتخصص الدراسي ؟ زين منو الي تأثرتي بيهم بهذا الاختصاص ؟
- شلون تشوفين البصرة بعيونچ ؟ عرفينا على مدينتچ ، اعتبري نفسچ گايد (دليل سياحي) و عرفينا على جوهرة العرب و قلب العراق
- من تصفنين على وضع البلد تعتقدين انه اولادچ راح يعيشون بـ اجواء افضل من الي عشتيها ؟ عندچ امل بتحسين الاوضاع ؟ زين صدگ هو شنو الوطن بنظرچ بدون كلام رسمي ^_*
- لو اتيحت الچ الفرصة ان تعيشين بغير بلد ، اي دولة راح تختارين ؟ وشلون تحبين تعيشين كـ مهاجرة لو لاجئة ؟ وليش بالخصوص اختاريتي هل دولة شنو الي يعجبج بيها !
- اخذي نفس عميق و غمضي عيونچ و گليلي شنو القناعات الي تغيرت عندج من خلال قراءاتج للمواضيع الدررية ؟ ومنو الاعضاء الي ساهموا بتغير هل قناعات ؟
- حسب اجوبتچ انچ حديثة عهد بالكرة ، وما ملحگة زين على ايام زيدان بالملاعب ، طبعاً عمرچ خسارة ، بس تعالي هسه و عدديلي افضل عشر لاعبين انتِ عاصرتيهم بعينچ و شفتي لعبهم الحلو ؟
- تگدرين تذكرين شنو الشيء الي چنتي تحبين تقتنيه بطفولتچ لكن چان صعب تشتريه بسبب قيمته المرتفعة ؟ يگولون الانسان من ينحرم من شيء يبقى يتذكره !
- شنو طبيعة الكُتب الي تحبين تقريها ؟ و شنو غيرت بيج ؟
- صفني زين و فكريلي بفلم شفتيه و بقى عالق بذاكرتچ لانه غير تفكيرچ اتجاه شيء مُعين ؟ بالمناسبة منو الممثلين الي تحبين تتابعين اعمالهم ؟ و منو المطربين الي تسمعيلهم ؟
- شلونها تحضيرات البصرة للخليجي ؟ شايفين شيء ملحوظ فعلاً ؟ راح ترحين للملاعب لو ابو عبوسي مايحب هيچ اجواء ؟
- يگولون التنس لعبة الاغنياء بس اني كسرت هل قاعدة لان فقير و احب التنس ، تعرفين فيدرر و سيلينا ويليمز ؟ بعتقادچ شنو المُتعة بهل رياضة ؟ طبعا نصيحتي التنس من امتع الرياضات هي و كرة القدم الامريكية لان تنافسية عالية
- يُقال ان المال ليس اهم شيء في الوجود و لكن هو ثاني اهم شيء بعد الاوكسجين ، شنو رايج بهل حچي ؟ و لو عندچ مليون دولار ، شنو راح تسوين بيهن ؟
- سؤال يتطلب امانة بالنقل لانه موجه لزوجج و نريد تجيبيلنه جوابه حرفياً ، شنو الي غيرتيه بحياته ؟ و بعد ما تنقليلي جوابه انطيني رأيج هل چان مُجامل لو فعلاً حاسة انچ تستحقين كل كلمة گالها ؟
- مُجتمع الدرر هو شارع عراقي عربي ، و الشارع كلشي نشوف بي الزين و مو الزين ، اكو اشخاص انصدمتي بيهم ؟ چنتي تحترميهم وبعدين اكتشفتي انچ مخدوعة ؟ اكو اشخاص ضايقوچ حتى مع علمهم انچ متزوجة ؟ و لو صار هل شيء راح تگوليه لزوجج لو تخفيه حتى لا تجرحين كبريائه ؟
- العراق بنظري اجمل شيء بي حضارته ، تأريخه ، شنو الي تحبي و تفتخرين بي بتاريخ العراق ؟ و سؤال ثاني بطابع خيالي ، شتتوقعين حيكون رد فعل حمورابي لو رجع و شاف الي ديصير بحاضر العراق ؟
- لو اتيحت الچ فرصة تلتقين بـ اعضاء بالدرر انتِ و محمد ، منو تحبين تلتقون بيهم ؟ و شمعنى همه ؟ زين هل فكرتوا بهيچ خطوة بيوم من الايام انه چنتو تسولفون انتِ ومحمد فلان عضو شلون راح يكون ع واقع لو التقينه بي ؟
خلصت حتى لتگولين يثقل عليه
حلوة وإعتادت أن تأتي دائماً بالمرتبة الأُولى وبـ مقام التباهي.
بكلمات تملوها الحب والسلام اهديها لكل من تواجد هنا
كانت حلقة مميزه وجميلة
اتقدم بالشكر والتقدير للضيفه زهرة اللوتس
شكر خاص الئ فقار الكرخي
شكر لكل من ساهم في نجاح الموضوع.
شكرا لكل من تابع وتواجد معنا
انتضرونا بحلقة جديده وضيف جديد
اعتذار للصديقنا رامي هذا مايسمح لنا وقتنا
تغلق
- شعجب اختاريتي قسم اللغة العربية بالتخصص الدراسي ؟ زين منو الي تأثرتي بيهم بهذا الاختصاص ؟
ـــــــــــــــــــــــ
ماادري .. اني صرت أميل للعربية من جنت بالمدرسة الابتدائية وانوب البنات بالاعدادية نفخني هههه يگوللي شنو امچ جابتچ وهي تعربكان اي إعراب عدنه مايعصى علية .. وومنها حددت انو اني مكاني بقسم اللغة العربية .. الگه روحي هناك .. على الرغم والدي هواي قنعني ادخل اختصاص انكليزي لان العربي ما إله مستقبل مثل ميگول بس اني عاندت وتالي تندمت ..
.. هذا اللي ميسمع كلام ابوه
ماتأثرت بشخص من خارج البيئة اللي عايشة بيها .. استاذتي من الكلية .. ممكن اكول تأثرت بيهم شوي
ــــــــــــــــــــــ
- شلون تشوفين البصرة بعيونچ ؟ عرفينا على مدينتچ ، اعتبري نفسچ گايد (دليل سياحي) و عرفينا على جوهرة العرب و قلب العراق
ــــــــــــ
البصرة تخبل گمرة وربيع
بس مع هذا بصرتنا الجميلـة نحبها
واتمنى تعذرني اني مااعرف اصير دليل سياحي .. اني من بيتنا لبيت اهلي ومن اهلي لبيتنا
ــــــــــ
- من تصفنين على وضع البلد تعتقدين انه اولادچ راح يعيشون بـ اجواء افضل من الي عشتيها ؟ عندچ امل بتحسين الاوضاع ؟ زين صدگ هو شنو الوطن بنظرچ بدون كلام رسمي ^_*
ــــــــــــــــــــــ
والله مدري شگولك ياخوية .. المجتمع اللي عايشين بيه ميبشر بخير .. شو جاي يصير للاسوء بس مع هذا لازم نحسن الظن بالله .. بلكت اللي يجون ورانا.. الجيل القادم يصير افضل من عدنة ..
اذا تجي للعقل تشوف انو هاي الارض كلها وحدة وهي ملك لله سبحانه .. وبمعتقدنا انو الامام المهدي عجل الله تعالى فرجه الشريف من يظهر راح يحكم العالم كله يعني بعد ماكو حدود ودول مثل هسه .. لذلك اشوف سالفة الوطن مالها معنى ..
بس روح الانتماء موجودة بداخلنا وممكن نكون تعودنا عليها او هيج شي .. يعني اني من اسمع النشيد الوطني اشعر بالانتماء والفخر وبسبب وضع البلد حاليا تاخذني العبرة .. ومن اشوف شخص عراقي ابدع بمجال معين افرح له كونه عراقي واحس اني اللي محققة هالشي
الوطن هو ناسنا اللي عايشين ويانه .. اللي قريبين من عدنه .. اهلي وطن بالنسبة لي .. امي وابوي واخواني
... زوجي وطن اولادي وطن .. الناس اللي احبهم وطن
لذلك اگولك گلبي يخالف عقلي ... الوطن يعنيلي وكلش هواي ... من شماله لجنوبه وكل ناسه هم اهلي وناسي
ـــــــــــــــــــ
- لو اتيحت الچ الفرصة ان تعيشين بغير بلد ، اي دولة راح تختارين ؟ وشلون تحبين تعيشين كـ مهاجرة لو لاجئة ؟ وليش بالخصوص اختاريتي هل دولة شنو الي يعجبج بيها !
ــــــــــ
ماادري مااتوقع روحي خارج العراق رغم كل المآسي اللي جاي نعيشها بس اذا اضطريت كلش .. اختار الامارات
اشوف العمران والتطور اللي بيها بالاضافة انو هي دولة عربية اسلامية يعني عادات وتقاليد ودين مقاربة لنا ممكن من نعيش بيها مراح نواجه صعوبات هواي ..
اما شغلة مهاجرة او لاجئة .. اعذرني مااعرف شنو الفرق بينهن .. اتمنى منك لو من يصير عندك مجال تشرحلي معناهن
ـــــــــــــ
- اخذي نفس عميق و غمضي عيونچ و گليلي شنو القناعات الي تغيرت عندج من خلال قراءاتج للمواضيع الدررية ؟ ومنو الاعضاء الي ساهموا بتغير هل قناعات ؟
ــــــــــــــ
تريد الصدگ اكو هواي اشياء تغيرت عندي وقناعات بهالفترة من رجعت للدرر .. يعني ابسط مثال من خلال زيارتي الاخيرة للمراقد الدينية صرت مااشمر روحي على اي شباك وابوس بيهم وكذا .. فقط الائمة عليهم السلام اللي يستحقون هالشي .. اني مااگول انو اصحاب الائمة ميستحقون هالمنزلة ..هم افضل الناس بعد اهل البيت عليهم السلام .. بس اذا احنه على كل شباك نبوس ونشبگ لعد شنو من قدسية ضلت لاضرحة الائمة ..
اصحاب الائمة اصير گبالهم بكل احترام ومودة واسلم عليهم واصلي ركعتين لوجه الله وفقط ..
اما الاضرحة اللي ممقتنعة بيهن ومااحس هالمكان لي بيه وياه ارتباط روحي ماازورهن ...
وهالشي انتهبت عليه من خلالك .. انت ( انسان ثاني)
هواي نبهتني على هيج شغلات من خلال مشاركاتك بالمواضيع ومن خلال مدونتك .. وخليتني اصير وهابية مثلك
ــــــــــــــــــــ
- حسب اجوبتچ انچ حديثة عهد بالكرة ، وما ملحگة زين على ايام زيدان بالملاعب ، طبعاً عمرچ خسارة ، بس تعالي هسه و عدديلي افضل عشر لاعبين انتِ عاصرتيهم بعينچ و شفتي لعبهم الحلو ؟
ـــــــــــــ
رونالدو وميسي ومودريتش وامبابي وكريم بنزيما وهالاند حاليا وليڤاندوفسكي وفينسيوس وفالفيردي وكاسيميرو ... وطبعا تعذرني اني مااتابع كل المباريات بس ريال مدريد ومرات اشوف برشلونه لذلك اللواعيب اللي مختارتهم من هالاندية ..
ـــــــــــــــــــ
- تگدرين تذكرين شنو الشيء الي چنتي تحبين تقتنيه بطفولتچ لكن چان صعب تشتريه بسبب قيمته المرتفعة ؟ يگولون الانسان من ينحرم من شيء يبقى يتذكره !
ـــــــــــ
اذا جبت طاري الطفولة فالالعاب چنت محرومه منهن
يعني اللعابات كوني بنوته .. ماكانوا اهلنا يگدرون يفروهن لنا بذاك الوكت بسبب الاوضاع اللي عايشينها او يمكن يشوفونهن شي مو مهم .. لذلك ضلت لكبرتي واني احب اللعابات .. يعني مرة واني حامل بعباس رحت للسوك واشتريت لعابة چبيرة .. وفرحانه بيها وخطية اشوف امي مكسور خاطرها وتگول سوده علية كنا حارمينكم من هالاشياء لان ماجنا منتبهين عليهن..
بس تبقى فرحتي بيهن واني جبيرة مو مثل واني صغيرة
بالطفولة هالاشياء له طعم وفرحة خاصة بيهن ..
ـــــــــــــــــــ
- شنو طبيعة الكُتب الي تحبين تقريها ؟ و شنو غيرت بيج ؟
ـــــــــ
يعني اني احب اقره الادبيات .. يعني من جنت بالكلية جنت اجمع مصروفي واروح اشتري بيهن كتب ادبية ..
ويعني احس اكو تأثير لهن على سلوكياتي وافكاري بالحياة
ـــــــــــــــ
- صفني زين و فكريلي بفلم شفتيه و بقى عالق بذاكرتچ لانه غير تفكيرچ اتجاه شيء مُعين ؟ بالمناسبة منو الممثلين الي تحبين تتابعين اعمالهم ؟ و منو المطربين الي تسمعيلهم ؟
ــــــــــــ
الصراحة اني مو كلش وي الافلام يعني الفلم اللي اتابعه بس اتابعه يعني من يخلص وره يوم انسى كلش .. ومااتابع ممثلين معينين انما اكو افلام تعجبني القصة واتابعها .. حتى المطربين مااسمع .. اكثر شي اسمع قصائد دينية بس اذا صار وسمعت اغنية بالصدفة وعجبتني ارجع اسمعها اكثر من مرة ...
ـــــــــــــــــــــ
- شلونها تحضيرات البصرة للخليجي ؟ شايفين شيء ملحوظ فعلاً ؟ راح ترحين للملاعب لو ابو عبوسي مايحب هيچ اجواء ؟
ــــــــــــــــ
والله ماادري ياخوية يعني لازم اروح اگعد وي المحافظ واسأله شسويتوا ماسويتوا ..
الكورنيش صار حلو من بعدما كان مُهمل .. وبعدهم جاي يشتغلون لهاي اللحظة .. وصرنا ندعي ياريت كل سنة يسوون عدنه بطولة شكل
اما عن روحتي للملاعب فاني وابوعبوسي مانحب هاي الاجواء والازدحامات والهوسة .. وانما شاميات وكرزات وعصاير ووليداتنا يمنه ودافين ونشغل اللعبة على التلفزيون ونتابع .. من رأيي هيج احلى ..
ـــــــــــــــ
- يگولون التنس لعبة الاغنياء بس اني كسرت هل قاعدة لان فقير و احب التنس ، تعرفين فيدرر و سيلينا ويليمز ؟ بعتقادچ شنو المُتعة بهل رياضة ؟ طبعا نصيحتي التنس من امتع الرياضات هي و كرة القدم الامريكية لان تنافسية عالية
ـــــــــــ
الصراحة مااحبها .. احسها لعبة مملة انو شخص يتابعها .. ممكن كرة السلة چان گولتلك بيها مجال
ـــــــــــــــــ
- يُقال ان المال ليس اهم شيء في الوجود و لكن هو ثاني اهم شيء بعد الاوكسجين ، شنو رايج بهل حچي ؟ و لو عندچ مليون دولار ، شنو راح تسوين بيهن ؟
ـــــــــــــــ
بزمنا هذا يعتبر هذا الكلام صحيح .. يعني اللي ماعنده فلوس حسرة عليه ياكل لگمه بيها خير لو يلبس ملابس زينة او يسكن بمكان يلگه راحته بيه .. واذا تمرض وماعنده فلوس عود سلملي .. لذلك اعتبر المال كلش مهم بحياتنا ... بعد اكو اكثر من قول ... لو كان الفقر رجلا لقتلته ... !!
واذا صار عندي مليون دولار حاليا ممفكرة شسوي بيهن عود خلي يطيحن بيدي وذاك الوكت الله كريم ..
ــــــــــــــــ
- سؤال يتطلب امانة بالنقل لانه موجه لزوجج و نريد تجيبيلنه جوابه حرفياً ، شنو الي غيرتيه بحياته ؟ و بعد ما تنقليلي جوابه انطيني رأيج هل چان مُجامل لو فعلاً حاسة انچ تستحقين كل كلمة گالها ؟
ــــــــــــــ
هذا السؤال بالذات مااكدر اجاوبك عليه لان محمد مو من الاشخاص اللي يگدرون يعبّرون عن مشاعرهم بالكلام ..
لذلك تعذرني ...
ــــــــــــــــــــــــ
- مُجتمع الدرر هو شارع عراقي عربي ، و الشارع كلشي نشوف بي الزين و مو الزين ، اكو اشخاص انصدمتي بيهم ؟ چنتي تحترميهم وبعدين اكتشفتي انچ مخدوعة ؟ اكو اشخاص ضايقوچ حتى مع علمهم انچ متزوجة ؟ و لو صار هل شيء راح تگوليه لزوجج لو تخفيه حتى لا تجرحين كبريائه ؟
ـــــــــــــــــ
شوف اگولك على شغلة .. من سجلت بالدرر ب2012 وشفته مكان حلو .. وره سنة گلت لاختي الاصغر مني تعاي خل اسويلج حساب بالدرر احسن مماضاله بالفيس واشكال مدري شنو ماشنو تلفي عليج .. هذا الدرر اجتماعي وبيه ناس كلش محترمين وبيه قوانين يعني تگدرين تأمنين على نفسج بيه .. المهم قبلت وسويت لها حساب بذاك الوكت اني عمري 23 وهي بعدها كتكوته
شو هاي خذتلها يوم واحد وگالت ماادخل بعد ومااريده مو كلش عجبني وصعب .. يمعوده منا منا اعلمچ عليه ماقبلت ... فـ بقى عندي الحساب مالها .. وچان يجي اليوم اللي اضطريت افتح حسابها واشارك بيه ايام التزعطط
المهم اكو اشخاص بالدرر كنت اعتبرهم قدوه وكلش معجبة بيهم وباسلوبهم واكو بيهم جانت الديانة تخرخر من اذاناتهم .. من خلال هذا الحساب عرفتهم على حقيقتهم واكتشفت عندهم روح التزعطط والتلطلط
مو كل الاشخاص ها .. واحد اثنين هيج شي .. من جنت زهرة محد يتقربلي بس من صرت كتكوته بحساب اختي .. صار الكلام ثاني وكلش انصدمت الصراحة وضجت همين وكتها .. المهم كم يوم هن وبعدين تصالحنا اني ومحمد وتركت هالحساب وحتى نسيت الرمز مالته .. بس من خلاله كشفلي اشخاص كنت حاسبتهم غير شي .. بس طلعوا ولا شي
اما هسه واني متزوجة . ابد والله ولا شخص ضايقني من رجعت ولهسه بالعكس مالگيت غير الاحترام والتقدير وهم كلهم اخوتي واعتز بيهم .. بس لو صار هالشي اكول لو .. راح انطي علم لمحمد لان بطبعي مااعرف اضم عنه شي ابد ...
ــــــــــــــــ
- العراق بنظري اجمل شيء بي حضارته ، تأريخه ، شنو الي تحبي و تفتخرين بي بتاريخ العراق ؟ و سؤال ثاني بطابع خيالي ، شتتوقعين حيكون رد فعل حمورابي لو رجع و شاف الي ديصير بحاضر العراق ؟
ــــــــــــ
هو احنه حاليا عدنه بس التاريخ والحضارات نطگطگ بيهن على الدول
ـــــــــــــــــ
- لو اتيحت الچ فرصة تلتقين بـ اعضاء بالدرر انتِ و محمد ، منو تحبين تلتقون بيهم ؟ و شمعنى همه ؟ زين هل فكرتوا بهيچ خطوة بيوم من الايام انه چنتو تسولفون انتِ ومحمد فلان عضو شلون راح يكون ع واقع لو التقينه بي ؟
ــــــــــــــ
لو صارت والتقينا باشخاص من الدرر اتمناهم يكونون سوسن وسوزان وام حمودي .. وماادري ليش هم بالذات يمكن لان يعجبوني واحبهم .. والصراحة ابد ممفكرين انو شلون راح يكونون من نلتقي بيهم ..
ـــــــــــــــــــ
خلصت حتى لتگولين يثقل عليه
ــــــــ
تريد الصدگ لو جمعت كل اجوبتي على اسئلة فقار وعلي ماتجي ربع اجوبتي على اسئلتك .. شهالاسئلة المطولة هاي يااخي
عاشت ايدك وماقصرت ... ربي يحفظك
التعديل الأخير تم بواسطة دُعےـــآء ; 22/December/2022 الساعة 1:58 pm
