اليوم چنت راجع من معاملة ومتنرفز وضايج وداتمشى حتى اخذ فورت ارجع بي للبيت لأن المسافة قصيرة نوعاً ما ماتسوه اخذ تكسي علمودها
ف اثناء مدامشي وگفت بصفي تكسي يسوقها رجال چبير بالعمر ف كلي اصعد
گتله ماريد حجي داتمشى لجوه الجسر مو مسافة چبيرة
كلي اصعد على حسابي ف اني گلت ليش لا وصعدت
اني بالعادة اخلي سماعاتي باذني من اصعد تكسي تجنباً للحوارات والتقصقص الماله داعي
بس من اصعد ويا كبار بالعمر ما البسهم لأن احب سوالف الكبار
ف مشينه شوية ووگفنا بازدحام
ف الحجي گال الحياة شگد حلوة
التفتت عليه التفاته خفيفه وگتله غريبة اول ابو تكسي اصعد وياه ويگول هالحچاية بدون ميتشكى من الحياة وصعوبتها وابتسمت
گال عمو هذولة اغبياء ، الحياة احنه اللي نقرر شون نعيشها سواء بالسعادة او الحزن
السعادة مامشروطة والحزن مامشروط
هذول اختاروا يعيشون بحزن وشكوى ودائماً تشوفهم معبسين وكارهين نفسهم
حتى لو چانت الحياة قاسية عليهم
هذا مو مبرر انو يقسون على نفسهم ويأنبوها
اني قبل اربعين سنة بعد وفاة والدتي واني چنت وحيدها
يگول قضيت شهور عايش بالحزن واعتقدت انو راح اظل هيچ طول عُمري وكأنو الحياة توقفت بالنسبه الي
بس فديوم صحيت من النوم وسألت نفسي
اني لشوكت حبقى هيچ حابس نفسي
اني ما استاهل اكون سعيد ؟
صح الله مارزقني اخوان يهونون عليه وحشة فراق امي بس هذا مو معناها ماعندي احد
اني عندي نفسي
ويگول من يومها اخذت عهد على نفسي
انو اذا ما اضحك من كل كلبي كل يوم اقل شي ٥ مرات اگول قصرت
وليومك هذا ما فديوم تولولت من شي
ولافديوم تذمرت دائماً اضحك وابتسم بوجه الناس واساعدهم گد ما اگدر
ورغم حالتي البسيطة اني احمد الله واشكره كل يوم سواء اشتغلت وانرزقت
وسواء رجعت للبيت بدون فلوس
گال اني طالع من الفجر ولحد هَسه مامصعد كروة وشفتك من بعيد دتتمشى جوه الشمس ماهنت عليه
رغم اني ماعرفك ولا شايفك بحياتي
بس الناس لبعضها ومثل ما الله سخرني الك اني متأكد الله راح يسخر الي ناس
هيچ الحياة تمشي ولهذا دائماً اكول الحياة حلوة والحمدلله
بعد ماخلص كلامه ووصلت للمكان اللي اريده
گتله : حجي الحياة صعبة وقاسية هواية
بس اللي يهونها ويخليها حلوة هي الناس اللي من امثالك اني راح انزل وحيبقى كلامك بگلبي اني حتى اسمك ماعرفته بس راح ابقى دائماً ادعيلك براحة البال وبالرزق وبالخير
والخير يندل اهله
وحاولت انطيه كروه بس رفض
و ودعته ونزلت
اني ما اگدر اشرح شگد هاي الكلمات البسيطة سعدتني وخلتني اعيد تفكيري بهواية امور بحياتي
هواية امور چنت ضايج منها ومعظمها اشياء تافهه چنت شاغل عقلي بيها ويومية ازعج نفسي بالتفكير بيها
خلاني اتأكد انهُ صدگ السعادة قرار وصدگ ماكو شي يستاهل نزعج نفسنا عليه
واللي يقرر يعيش بحزن مراح يخسر غير نفسه
وصدگ الواحد ميحتاج احد حتى يكون سعيد
السعادة كلها بكل انواعها تبدي من عندك
وتنتهي عندك
وكل اللي تحتاجه آنك تسامح نفسك و تحب نفسك، تعطف على نفسك، و تدعم نفسك.
أنت تحتاج الى نفسك حتى تكون سعيد
مقتبس من حياة مواطن عراقي
رد مع اقتباس
المشاركة الأصلية كتبت بواسطة حفيدة حمورابي
