هنا

[ارجع يازمان]

انته داخل معركه و عندك نزال
اشلون تنطي سيفك العدوانك!!
.
جان كلش مو وقتها الاعتزال!
هذا رأيي ,, وانه من أعوانك!
.
جنت شاعر للصدر بالأرتجال
وهاي الابيات الاجت بأحسانك!
.
يعني مو قصدي أشخصك بالسجال
رايح أقصد كل وَفي ابكيعانك!!
.
راح أمثلك بالشعب والأمتثال,,
وبيك أخاطب كل طيوف ألوانك!
.
واعتذر من القطع عني الوصال
ابسبب أبيات البجن لأحزانك!!
.
صدك كلبك عالشعب فعل ومقال,,
وصدك طاعة ربك ابوجدانك!
.
وصدك همه اذيول اجو بالاحتلال!
وصدك انته امن الوطن نيشانك!
.
لكن السياسه ,, متريد انفعال!
اتريد وياها تروَض السانك!
.
كل قرار البلغضب ماله اعتدال
ماوراه غير الندم واشجانك!
.
اكبالك الشيطان مابيها مجال!
رايح ايتوب ويجي الأيمانك!!.
.
علي فوك المنبر اتسبه الجهال!
وانته غش الطاغيه ابميزانك!!
.
الرحمه صارت بعد من سابع محال
سلمت مفتاحك السجانك!!
.
انتظر صوله جديده والقتال
ابتهمة ارهاب ويدك بيبانك!!
.
بعد ماينفع ندم,,بس السؤال؟
ابيا سلاح ادافع اعله اخوانك!!
.
الجيش عدهم ,,والخزينه,,والدلال
وانته بس الشارع ابديوانك!!
.
راح ينعاد القتل والاعتقال
بيكم ,, وسلميتك! وبرهانك!!
.
والقضاء وياهم وينهي الجدال
التهمه عدهم جاهزه العنوانك!!
.
الصاروا ابفكر الدجل والاحتيال!
ما يهمهم لو لبست أكفانك!!!
.
الما يفَرقون ابحرام اولا حلال
ما يطبقون أيه من قرأنك!!
.
طالما عند الخصم صار الكمال!
يعني حَضر روحك الأحزانك!
يعني حضر روحك الأحزانك!!
حسين االساعدي