شئ من الواقع أبني عمره اربع سنوات ونصف عنودي ، وشالع قلبي ، مايسمع الكلام ، راسه يابس طالع على ابوه وعماته ، نحس مثل جده ابو ابوه ، وبخيل مثل جدته ام ابوه حاجته عزيزه ومايقبل احد ياخذها منه
ما طالع عليه ما يشبهني بأطباعه ....الخ
زين شنو تصرفتي وياه ؟
استخدمت كل الطرق ومافاد وياه !!
طيب شنو هاي الطرق اللي استخدمتيها ؟
والله لا فاد وياه ضرب ولا فاد وياه صياح ولا فاد وياه معاقبه اصلا وكح جاي يزيد بتصرفاته وما ينقص ، اكله من تكمل العاب لا تبقيهن مطشرات مايفيد ، اكله لا تشخبط عالحايط يعاند ويشخبط ، اكله لا تضرب اخوك الصغير بالعناد يضربه موتني
زين وشلون كنتِ تعاقبينه ؟
والله اعاقبه ازاعله واطرده واكله لا تجي يمي بعد اني ما احبك انت عنودي انت تجذب هواي انت وكح .
عزيزتي الام راح اغردلك شويه لان صراحه انت تتحدثين واني احس قلبي يفور كالبركان من السمعته ، اسمحيلي اكلك تصرفاتك كلها غلططططططط ، يعني صراحه لازم نجلس معاك عدت جلسات لكن سوف اتكلم بأختصار ...
الطفل من يكون تحت عمر ثمان سنوات ونجي احنه ننطي اوامر مثلا (اسبح ، اكل ، اشرب ، تعال ابدل ملابسك ....الخ ) وهو يرفض وعادتا يجاوب ب (مااا) يرفض كلشي نأمره بي ، هذا مو عناد هذا اثبات ذات او اثبات شخصيه هنا شخصيته دا تتكون هنا دا يعرف هو شخص خلقه الله حر وله الحريه في اتخاذ القرار وله الحريه في الاختيار واحنه واجبنه ننمي عنده هذه الصفه وليس طمرها ، واحنه كأمهات واباء من نشوف طفلنا يرفض اوامرنا هنا لازم كوولش نفرح تعرفين ليش ؟
لا والله ست ما اعرف !!!!
نفرح لان هذا يدل على ان طفلنا عنده شخصيه قويه ومو سهل واحد يستغله ، عنده اراده ويرفض اذا اجه واحد وراد يعتدي عليه او يستغل جسده لذلك من طفلك يرفض اوامرك لا تعصبين ولا تحزنين .
زين ست وشنو العمل شسوي بهاي الحاله اذا كلشي
أقوله اله يجاوب (مااا )؟
احسنتي هو هذا السؤال المهم وراح اجاوبك عليه ...
قبل شويه شنو تحدثنه ؟ ( انو الطفل يريد يشعر ان القرار بيده واله حريه بأتخاذ القرار ) لذلك نجي احنه نلعب اللعبه بشطاره وذكاء هم احنه ننطي حريه للطفل بأتخاذ القرار وهم نخلي يسوي النريده ...
يمكن هسه دختي شلون والمتابعين هم داخو بس راح اوضح ..
من تردون اطلعون لفد مكان واجيتي تردين تبدلين ملابسه وهو راح يرفض ويعاند مايقبل يلبس القطعه اللي انت مختارتها وهذا طبيعي جدا ، لذلك انتِ من البدايه حددي قطعتين انتِ موافقه يلبس وحده منهم وقولي لطفلك (حبيبي شنو رأيك تلبس هاي القطعه ؟لو هاي القطعه ؟) هو هنا راح يحس نفسه ملك وسلطان زمانه ويختار وحده منهم ..
او مثلا تردين طفلك ياكل برتقال جيبي ثنين وقولي اله ( حبيب الماما راح ياكل هاي البرتقاله لو هاي البرتقاله ) وهو هنا ايضا راح يختار ..
بالتالي انتِ عززتي بي الثقه بالنفس وانطيتي الحريه وخليتي يسوي اللي انتِ تردينه .
وحتى ما نسولف هواي وندوخك وندوخ المتابعين نكمل باقي الارشادات بجلسات اخرى لان عدنه هواي تعليق على الكلام الاول وهسه اول قضيه حليناها وعرفنه كيفية التصرف مع الطفل العنيد .
........................
رد مع اقتباس
المشاركة الأصلية كتبت بواسطة أبن الاشتر
