وما جِزت لسه اشتهيهم
اخ من تزهگ قصيدة بخاطرك ..
وانت موش انت وتموت بخاطرك
اخ من تشتاگ موعد والجفوف تضيع مدري
والسمه برازونة تلتم وتصغر الـ حد ما تموت
انت ضايع بين دخان الجگارة وقلق وهواس التريده
وخوف ياكل كل دفو براسك يشب
وليل يتشلبه على عيونك ذنب
ويا هلي ..
يا هلي اتفرفح بصدرك شوگ والوادم جذب
وانت ذاك انت الغريب ..
شما كبر اسمك غريب
شما عتگ حزنك غريب
اتلجمك النسمة التجي وما تشتهيك
ويبدي موتك بين باب وباب تصغر
وبين صوت وصوت تعثر
هلبت اويه الريح صوغة تترس اثيابك نشد
ويبدي موتك ..
وتجمد اگبال المرّي وتعرگ برد
هذا انه ..
ورگة ثگلها التعب والدنيا ريح
ومن طحت حنة اشتهوني ومامش اسم الله تصيح ..
وحدي وحدي
لا عيون التشتهيني
ولا ﭼـفوف التشتريني ..
ولا اشفاف الغَنّت اسمي ..
ولا سمة تلوليلي نام ..
ولا دفو اليشبگني طيف
ولا ﭼـفافي التشرب اعيوني اعله كيف
وحدي وحدي
بابي سكتة ..وعيني عالحيطان سكتة
و وحشة الحيطان تكتل ..
و ليل المتانين يتناكث فشل
وما جِزت لسه اشتهيهم ..
ارسم الموعد بـ اصابيعي جمر
وملگة حار .. واطفى عالمامش رماد
واركض شما بيه سنبل والگه موسمهم حصاد
و اخم روحي والتفت واتلمس اسمي
ولني ماكو .. بركضة الدخان شيلم النفس
وشيلمني .. وانا شوغة آخ بشفاف الخرس
وهاي هي ..الما لگوا اسمه يموت
الما خذوا ثاره يموت ..
جا بعد المن اموت ...
قاسم بخيت
رد مع اقتباس
