هي ذيج السالفه أبالي بعدها
راجت أحلامي بغفوتي
وأنتشى نومي لدلالك
كل حلال الناس يمي
وغوشت رايد حلالك
من عشگتك. . .
فاهيه الوادم چذب
وگلوب صبخه
لملمت نيتي و وگع
بيدر محبتك..
عنبرت شوفي
هله ملاگه ونظرتك..
من تلاگينه بحلم كلش گصير
الشوگ فززني لهواك
ومووتني الـ(ما عرفتك)
وأنت حگك
شلون تعرفني
وملامح وجهي ضاعت
مامش الريه هوه منك ندهها
حتى ذيج مرايتي
الصافن عليها
شكد تجاعيد بوجهها ..!
وأنت ما غيرت لونك
صايم أبليس بسكتي
ويفطر بمغرب "شلونك"
هي ذيج السالفه
أبالي بعدها. . .
سيّرت رغبة مشاوف.. مشتهانه
بحضن تسيورة سكر
الگمر ديرم عشگنه
أتمكيج بمسچه وتوضه
يريد يتمايل خصر
وهيست ريتي عطر.. بعروگها
روحي متعوبه المحنه ريوگها
النجم عاشرته كله
والسهر جربته كله
والحزن لوليته كله
بشفتي سكرانه السوالف
والهلال يضوگها
بليل گطرات المطر
جاسن نظرته
وروحي متروسه ورد
من تمر زفه بخيالي
أتسرفن لچادر ضحكتي
بهيده وأتبده "برد"
شوفني مسامر رفيج
وديرني بحضنك شمس
كاسر ملوحة سمارك.. ويه نيتي
بكل هداوه. . . بكل هداوه
شگد لذيذه السالفه التگضي همس
وأرد أگلك... ناري تچوي
يمي لا تخجل
صلافه بعيني فوت
تنجوي الشمعه وتعدي
تستحي وتالي تموت
كافي يتلولح عشگنه
بحلگ تنور الشماته
الـ حصتي من عده الرماد
وأني وأنت نعيش دنيا
ونكره الـ كلشي سواد
أشبگني حيل. . .
اليكتل السجان شبگه
نبحر بصافي النوايا
وخل يسولف سندباد
نترس النسمه حنين
أتهندم بماي أرد أوچدك
وأعثر تراب وحضن ونطيح طين
يا ذهب طبعك..
حلاته بچف صديج
كل عمر لونه أيتجدد
أعتگ بچفي معاضد
والمعاضد...
يغله من عدها العتيج
مجتبى المعن
رد مع اقتباس
