ليش نتوب..
والدنيا جثيرة ذنوب
وليش نخاف
مادام العمر مكتوب
وشنو ذنبي اذا حبيت
ماعندي كلب والناس عدها كلوب
وشنو ذنبي اضل طول العمر متعوب
واضل جندوب
يخنكني الهوة كلما تصير غروب
لاماتوب
لان شفت الدمع مفضوح
لان شفت العنب تارس شليل الكاع
وانشالت الرحمه والاقزام تلوح
وبية جروح
لان شحت اوجوهه الناس
وبس باب الله باقي بهل وكت مفتوح
وخربت حيل من شفت الحمل مطروح
وابو الحسنين مامش واليتامى تنوح
وغميت الوكت من جرد المستور
ويفضح بالشريف ويستر المفضوح
وخل صوتك يضل مبحوح
واسكت لاتصيح ال اه باعلى الصوت
اكو وادم تعيرك باجر من تفوت
وين تروح..وين تروح
ماترتاح منهم حتى من تموت
وون بسكوت
لان وادمنه صلفه ترفس التابوب
واحذر لاتضم اسرارك انته بير
طبع البير خاين بالاسرار يبوح
ولاكلمن يحبك كلت هذا الروح
الورد نفس الورد ويبين من ايفوح
وين تروح
كلي لياكتر ياصوب
اذا حجي الجذب مرغوب
وحجي الصدك مامجهوب
وكلشي بهل وكت مغشوش
صار وع النضر محجوب
وكلشي بهل وكت خسران
المايخسر يرد مغلوب
واجيت انته وبراسك راي
عفتني وخذت مني هواي
يريتك كون ابد ماجاي
حرت لاعدو لامحبوب
هية المشكلة الحسرات تفز هواي بيها كلوب
ويجيني الليل وباسمك افز مرعوب
وصيرن مثل شمعة ليل
تاكل روحها من ذوب
ويجيك الليل بس يا ليل
كل ساعه بحضن مذبوب
ليش نتوب....!
الشاعر حيدر رحيم الكعبي
رد مع اقتباس
