ربي العالمين من يعوضنا رح يكون عوض جميل اكثر مما كنا نتخيل .. من بعد تعب انهكنا او حزن استوطن ارواحنا .. من بعد كل دعاء دعيناه ونتوقع ان ماأُستجاب إلنه .. وكل احساس بالظلم كان جاثم على نفسنا .. راح ينسينا كل الي فات وكأنه ماصار .. وراح تبقى بس الفرحة والسعادة بـ گلوبنا وحوالينـا ..
من نحب من نصادق.. الناس المقربين بحياتنا لو مهما تكون مكانتهم بگلبنا ومهما يكون الحب والصداقة قوية بيناتنه لازم انطي مجال انو ممكن هالشخص يخيب ضني بيوم من الايام مالازم اثق الثقة الي بلا حدود هذا الشي اسويه علمود نفسى حتى اذا لاسامح الله وصار مايكون تأثيره كلش قوي على نفسيتي ان اكون اني متوقعه هالشي او مخليته ابالي انو ممكن يصير بيوم من الايام افضل مما انصدم وتتخربط كل حياتي ..
لان الانتكاسة الي راح تصير على گد الثقة الي ناطيتها للشخص الي خان ثقتي ..
ديروا بالكم على انفسكم واعتنوا بيها كلش زين لانها أمانة رب العالمين .. والأمانة لازم ترجع لـ صاحبها سليمة معافاة ..
جدي .. كلش احبه واتمناله الصحة والعافية وطولة العمر .. مجرد وجوده بحياتنا هالشي يخلينا مرتاحين ومطمئنين .. صوته ونظراته الحنونه ووجهه الماينشبع منه .. هاي الاشياء تزيح كل تعب وكل وجع من عدنه
لمتنا حواليه من نزوره وسوالفه نحسها أمان وراحة نفسية .. ربي لا يحرمنا منه .. هو بنظري نعمة الله.. ونعمة الله لازم تنباس وتنحط على الراس ..
مااحب اطلب من شخص شي مادي او معنوي بالمقابل اذا شخص طلب مني شي انطيه ولو كان غالي واني فرحانه اني گدرت اساعد .. اذا صار عندي كم فلس احب اصرفهن واشتري هدايا لاهلي والناس الي احبهم
ومااضم شي ولو كان بسيط .. اذا شخص نطاني معلومة او نصيحة استمع له للاخير ومااقاطعه وحتى لو كنت اعرف هاي المعلومة اسوي نفسي مااعرفها بس حتى لا يفقد لهفته وهو يسولفها لي .. احس هيج اشياء بسيطة قادرة ان تخليني فخورة بنفسي ..
راح ابدي اقره هاي الرواية .. بس شلون بداية تخوف.. ليلة سعيدة
ذكريـــات ..
صار موقف استفزني وماجنت متوقعة او يجي على بالي انو اني اهتم لهيج اشياء او تستفزني
زميلة ابو عبوسي بالدوام مواليد 91 عيد ميلادها امس وگلتله صار عمرها 33 اني سمعته لو تخبلت لان اني هم نفس مواليدها واعرف عمري 31 ورحت گبل نزلت تطبيق احسب عمرك وطلع صحيح 31 .. ووصيت ابو عبوسي يگوللها انو هي غلطانه
قبل لا اتزوج من جان عمري بداية العشرين مااهتم لهيج سوالف ابد واصلا بالعكس اكبّر بعمري مااصغّر ..
شنو معنى هالشي الي صار وياي استغربت كلش ..
معقوله لان كبرت ضليت احسب لعمري يوم يوم وتهمني هالسوالف ..
حتى قبل جنت اجتماعية وجان عندي اصدقاء هواي
هسه الناس الي اعرفها كلش قليلين ينحسبون على عدد الاصابع ..
قبل جنت اذا زعل مني شخص او اساء فهمي اتضايق كلش وادخل بـ أكتئاب ومرات ابچي .. اما هسه احاول ابرر مرة وحدة فهمني خير على خير مااتقبل اعتذاري اتركه
احس ماعندي ذاك الخلگ الي يخليني اكعد اتمصلح واتوسل وحبوبي لا تزعل مني ومن هالشي ..
ماادري شنو الاسباب الي خلت شخصيتي وتصرفاتي هيج تتغير .. ممكن تكون الضغوطات والتعب الي مريت بيهن او لان كبرت صدگ .. الله اعلم
تصبحون على خيــر ..
مرات تمر علينا اوقات نشعر بيها ان احنه شگد اقوياء ونفتخر بنفسنا من نتذكر كل المواقف الصعبة الي مرينا بيها وكل الاشياء الي كسرتنا .. مواقف تخلينا نتسائل ان شلون گدرنا نتخطى هيج ايام صعبة ونوگف على حيلنا .. ايام جان الضعف بيها مسيطر علينا . ايام جنا مانگدر ننام ليلة وحده واحنه مقهورين ومنكسرين لـ هالدرجة .. اذية من الحوالينا خلتنا مانثق بالناس بسبب خوفنا وضعفنا صرنا نشك ونتردد بكل تعاملنا وياهم ... الحمد والشكر لله وحده ان خلانا نگدر نتغلب على كل الضعف والانكسار الي جنا نعيشه .. احنه مو اقوياء گد ما چنا برعاية رب العالمين .. هو وحده قادر ان ينتشلنـا من كل الحزن والالم الي احنه بيها ويعوضنا بـ امور تنسينـا كل اللي مرينا بيه ..
الحمد لله دائما وابدا
رد مع اقتباس
