قطار العمر مو مثل القطارات
شما يعبر محطه ايذب فراگين
وتظل بس المكينه ابسچته اتلوچ
بانياب الدهر و اتزبر اسنين
وتسولف على اللي چان ما چان
و بمنجل كُبر تحصد بساتين
گبل چانت مزهره براحة البال
و هسه الحيل أصبح بالتفاطين
و كفت عين صلفه الساهرت ليل
عناد وي النعاس اتجبره ويلين
مض بيهه الغواش وسورب الشوف
ونعاتبهه هضم شو ما توچدين
وسنون الضحچ وبعافيه تلوچ
كلهه اتشلعت ، ظلت نياشين
وطفح لون الثلج وتلاله بالشيب
ابيض مو فرح ، عكس الموازين
يلم تالي العمر و يطش روايات
تزرع خوف بگلوب المساكين
ها جدام عينك شوفه ها طاح
ها ودع غفل ما يدري لا وين
مثل ومضة حلم ما چنه عشناه
عمر مزة وكت ، نزوة سلاطين
حسافه چي كتلنه الراح بالراح
والحاصل صفر بس العناوين
و الربحان بس العاشر الناس
بطيبه ، بكل درب يزرع رياحين
عليه يبجي اليحبه ابگلب محزون
لان طبع المحب يتحسف الزين
واخيراً تجتمع كلهه القطارات
وهنياله الخفيف وما ترك دَين
يم رب العرش و برحمته ايفوز
العدهم مرحمه وانظاف الايدين

(م)