كلمات قصيدة لجلك أكتب أشعاري (مكتوبة) للحاج باسم الكربلائي 1444هـ
......................
قصيدة لجلك اكتب اشعاري
للشاعر ضياء الربيعي
ليلة 21 محرم 1444
موكب و حسينية أم الحسن ع البصرة قضاء الفاو
......................
كلمات القصيدة

لَجلك أكتِب أشعاري
وأتقَرّب إلى الباري
وأترَجّى أنحِسِب يَحسين
قطره ابّبَحرَك الجاري
......................
أكتِبلَك واعرفك زين كَون وما يحِدّك حَد
أبْحِر بيك وانته ابعيد واغرگ بس يجيني المَد
سِكنْت ابجُرفَك وأدريك أمان وأمَنّت يا سَد
متْفَضّل عليّه اهواي وافضالَك فَلا تِنعَد
شِفتك عايش ابروحي
تلهج بسمك اجروحي
شَكتِب شَقرَه وانته البيك
تاهَت مُجمَل افكاري
......................
شَقرالَك إذا القرآن بِسمَك يقرَه وايْرَتِّل
ثوب العِز إلك يحسين وبس اعليك مِتفَصِّل
ظامي وما تريد الظِل بجروحك شمس تِنزِل
كلشي انطيته والباري كلشي ابإسمك امسَجِّل
تِذِكره ابآخِر أنفاسَك
يِرَتّل بالكهَف راسَك
بِعِت كلما مِلَكته وچان
ربّك للنَحر شاري
......................
إذا ضيّعتك اشألگه إنته الأغلى والأثمَن
عايش إلك لو هالناس سئلوني تعيش المَن
عُمري ابلا نَظِرْتَك خوف وبَس اوياك يتأمَّن
انته التكشِف الكُربات خيل الهَم إذا هِجمَن
خَسران الّذي عافَك
والأعمى الّلي ما شافَك
عِشگتك والدليل ادموع
عيني وحَسْرِتي وناري
......................
صَعبه ومُستحيل الماي يِطهَر من يلاگي الدَم
بس دمّك طُهُر لِلماي دَمّك ينطق ابلا فَم
ابشِسعك لو لِمَست الگاع بيه الگاع تِتيَمَّم
التراب الماي صوت الريح صَلّى النورك وسَلّم
يا أوسَع سُفُن طه
بِسمِ اللهِ مَجراها
يمنَعني الخَجل لو جيت
أطلب تِقبَل أعذاري
......................
جِبرائيل خادِم چان يفخَر مِن يهِز مَهدَك
وابْموتَك نِشَر ظِلّه وحَط جِنحَه تَحَت خَدَّك
وخادِم چان الك عبّاس سِمَعْت ابكثُر ما وَدَّك
يجلِس جِلسَة الخادِم يِدَنِّگ لو حِضَر عِندَك
جِبرائيل يستاهِل
ويستاهِل ابو فاضِل
لو أقتِبِس ذَرَّة نور
مِنهُم يعلى مِقداري
......................
أتقرَّب إلك يَحسين والكِلمات مَتوافي
ظلمَه ابنُص مُحيط ومُوج واشينفَعني مِجدافي
نخيتك يا سَفينة نوح صارَت تِرجِف اطرافي
ما عِندي سُواك ابيوم يظهَر كل أمُر خافي
حاشَه ابساعَة المَحشَر
تنساني يَبو الأكبَر
وماترضى افتِرِگ عَنَّك
وايصير الشِمِر جاري
......................
نسألكم الدعاء