اليوم رحت للمظاهرات
الله يساعدهم
البارحة ماعندي شي واتفقنا اني واصدقائي نروح للمظاهرات مال جماعة مقتدى
طبكنه السيارة كبال وزارة الخارجية ونزلنا مشي
حاطين صبات واكو شباب ٣ يفتشون اليدخلون
فتشونه ودخلنا
طبعا هذا الفتشني عبالك جاي يدلك مو يفتش
اخذنة فرة على هذولة اليوزعون اكل
لكينه واحد يوزع صواني تمن وعليها لحم
يمكن لحم غزال
جماعتي اكلو والصراحة اني ما اكلت
لأن قريت عالفيس اعلان من متنزه الزوراء
عن سرقة ٦ غزلان من المتنزه
وكلت خاف حرام اكل غزلان مسروقة
ورحت اكلت فلافل وشربت نومي بصره
وصلنا جوة يم مقر البرلمان
طبعا جان مغلق والناس حولة تفتر
الى ان صار أذان المغرب
توضينه وردنه نصلي
فشفت الناس كلها واكفة تصلي
الصراحة انصدمت
لعد عالفيس مو يكولون جماعة مقتدى بعثية وميصلون
لعد ذولة الديصلون منو
سألت صاحبي من جماعة الاطار
كالي هاي شبيك هذولة هم مثلنا جايين يتفرجون
واكو مدسوسين
كتلة لعد جماعة مقتدى وينهم
جان نشوف شباب ثنين نايمين بالموكب
كلي هذولاك جماعة السيد
الصراحة ما اقتنعت
لأن حتى جماعة يزيد يصلون
المهم صلينه وضلينه نتمشى ورغم هواي ناس واكفين شغلهم بس يشخصون
صار دنية الليل ورجعنه اثناء خروجنه من البرلمان
لكينه ناس ملتمة على واحد مادري شديوزع
تقربت جان اشوفة يوزع باجة
رحت اخذت صينية مثرود بيها خبز
ومديت ايدي كدام هذا الديوزع
شال جفجير جبير ودارة بالصينية
اخذتها وطلعت من الهوسة وصحت اصدقائي تعالو اكلو كالو يمعود ناكل وانحير ماكو مي نغسل
هاي اجتي من يمي واكعد اثرد وحدي
طبعا الدسومة البيها مو طبيعية
اكلت الاكل وحدي
ورحت اغسل من يم ابو موكب عندة تانكي
جان يجون ولد ثنين ديغسلون واسمعهم يحجون
هو هذا الجاموس مليان دسم
كتلة ياجاموس
كال هاي الباجة مال جاموس
اويلي الله كبل كامت تلويني بطني
مخليت حباية مال معدة ما بلعتها
ولا سفن ولا صودا
الله شاهد تكطعت مصاريني
وللمستشفى ورادو يسوولي غسل معدة
بس من كلولي بالطريقة مال الغسل طفرت كتلهم مابية شي
انوب كلما اتذكر التشريب الشربته
مدري شيطلع من اذني
ويانه ولد صدري
كال شور بيك السيد
صاحبي الاطاري القافل
كالة قابل اكل لحم السيد وشور بي
يمعود صوج الباجة
ورجعت للبيت مستبرد مدري شبية بس ارجف
من كد حبوب المعدة البلعتها
واليوم كلت اروح اشوف جماعة الاطار بالجادرية شطابخين
رد مع اقتباس
المشاركة الأصلية كتبت بواسطة حفيدة حمورابي
