بالمدمع الذروف
متعني للطفوف
___
بحالة حزن لمّن وصل لطفوفه
يمشي لابو اليمه ويطگ بچفوفه
ظهره انحنى وبوجه صارت خوفه
مرمي على وجه الصعيد ايشوفه
وشحاله من يشوف
بالمدمع الذروف
____
يوصل ودمعه عالجسم يتگطر
وبصوته يصرخ يا علي ما تحضر
بأيدك وأيدي ندفنه يا حيدر
الله اكبر من تشوف المنحر
ما اقسى هالضروف
بالمدمع الذروف
___
وينعى بقى جده بدليل مسجر
ويگله ويسولفله يشرح منضر
عندك علم جسم الحُسين موذّر
عندك علم صدر الحُسين مكسّر
متجسد الخسوف
بالمدمع الذروف
___
سيد شباب الجنه هذا الطايح
بس لا تگلي هذا دمه السايح
هذا الملّقب بالوليّ الصالح
يا ويلي يوگع عالتراب اللافح
وضيعها هالألوف
بالمدمع الذروف
___
بالعبره يقسم والقسم مضمونه
اي والعلي واسراره المكنونه
شفته ابويه وگصته المطعونه
عضام ابويه بالجسم مطحونه
متشجر السيوف
بالمدمع الذروف
___
طوبى لارض تتقدس اوي التربه
تضم الجسم مال الحُسين وگلبه
حتى الله كرمها وجعلها برتبه
بيها انتخي لحظه وتلين الصعبه
والعجبه بالحروف
بالمدمع الذروف
___
يا سيدي گال آني حزني سرمد
يبن النبي واعليك ليلي امسهّد
هالدنيا بعدك مظلمه يالأمجد
والآخره بنورك تشع يالسُؤْدد
وترجعله للرؤوف
بالمدمع الذروف
___
علي محمد الشمري
رد مع اقتباس
