عمه شو مشينا .. وينه عمي وينه
لا هذه ناكتنا ولا ذاك العلم علمنه

.. ١ ..

عمه ليش بلاية خيمة ضامتنا بهالهدم
نار وخيول ودماية عمه شو حتى بحلم
عمه وين ارجالنا التحمينه
مخدرات الوادم تسمينه
هسة شو ياهو اليجي يصد لينه
وينه ابو الحمية .. يفزع لرقية .. يفزع لرقية
شو ما فزع لينه الگمر .. ما خبريتي عمنه
لا هذه ناكتنا ولا ذاك العلم علمنه

.. ٢ ..

هذا اليسمونه حارس من گبل ما نعرفه
وين شبان العشيره هذا ياهو الكلفة
ليش هو اليحرس مو غيره
لا بو دين ولا ابو صاحب غيره
شافنه وعنه الوجه ميديره
بسطة هدداني .. والله خوفاني .. والله خوفاني
وين الزلم ياعمتي خلي نشتكي لزلمنه
لا هذه ناكتنا ولا هذا العلم علمنه

.. ٣ ..

لا فراشي ولا فراشج ليش مفرشتنا الرمل
كلها سكته بس مدامع ماكو امسامر گبل
بين دخان ووحمر واشتايم
من الرعب ما شوف واحد نايم
فرجه لليشمت وللايم
عمه هالعساكر .. النه شو تناظر .. النه شو تناظر
كل ساعة ويصدنه نذل من عينه ما سلمنه
لا هذه ناكتنا ولا ذاك العلم علمنه

.. ٤ ..

عمه ليش يحاوطونا ليش من نحجي همس
وين ابوي احسين غايب ليش ما شفته من امس
خلي يجينا وخل يلمنا بخيمه
انه بت عز واهلي اهل الشيمه
من امس ما غافيه بالهاهيمة
عنه لو اسالج .. صرتي دمعه كلج .. صوتي دمعه كلج
يا عمه مجبوره اسالج محتاجة لليلمنه
مو هذه ناكتنا ولا هذا العلم علمنه

.. ٥ ..

الليل بس بين صباحه خله بجفنا حبل
عمه وين انياگ اهلنا ليش نركب عالهزل
عمه حتى الرايه ماهي الرايه
الجانت بجف الگمر مو هاية
الروحه عن الرجعه فرق هوايه
ع الرمح يلالي .. شي واحسه غالي .. شي واحسه غالي
فوك الرمح شي كله دم والدم احسه دمنه
لا هذه ناكتنا ولا هذا العلم علمنه



كلمات : مازن الزبيدي






للاستماع الصوتي
MP3

تدوين حصري لمنتديات درر العراق
احمد الگرعاوي