هنا

[اميرالفتلاوي]

كلمات قصيدة ردتك تشرب ماي مكتوبة - الحاج باسم الكربلائي 1444 ليلة العاشر من محرم الحرام
.......
القصيدة: ردتك تشرب ماي
الشاعر: محمد العقابي
ليلة ١٠ محرم ١٤٤٤
الحاج باسم الكربلائي قصائد مكتوبة شهر محرم الحرام 1444
.............
رِدْتَك تــشرَب مــاي إو تِرجَع
ماردتـك تِرجَـــع مَنحُور
ماچنت ادري الطَفْ بي واحد
يِذبَح واحد سِت إشهور
............
وديتك إمن المَـهَـد للماي مو للسهم
حسبالي تِشرَب عَذِب ماي إو ترِد للخِيَمْ
تالي إبسَهَم حرملَه ابنَحرَك شِرَبت الأَلَمْ
و أزغَر شَهِيد أصبَحِت و أُمك گَلُبها إنثِلَمْ

وَدِيتَك تشرب مو تِذبَل
والدم بگماطك منثور
ماچنت ادري الطف بي واحد
يذبح واحد ست اشهور
...........
عبدالله چنت أنتظر ترجعلي متأمِلَه
ماكو اعله نحرك جرح وإشفافك امبلِلَه
امنين إجاك السَهَمْ و إمنين إجَتْ كربله
كُون الله يالمِنذِبِح ياخِـذ عُـمُـر حَرمَلَه

ياريت الحط سهمه ابنحرك
چف أيده الصابك مبتور
ماچنت ادري الطف بي واحد
يذبح واحد ست اشهور
..........
لو ادري هِيچ العذب يحرمني من شوفتك
ما شِلتَك إمن المهد خليتك إبنُومِتَك
إشمدريني يُمه السهم يِستَطمِع ابرگبتك
حسبالي ماي النهر يِتحَصَل إِلشِفِـتَـك

إشفافك ماضاگت كل گطره
والماي اصبح مامعذور
ماچنت ادري الطف بي واحد
يذبح واحد ست اشهور
...........
عبدالله عمرك خلص يُمه إو مكانك بُرَد
وانه ابمكانك بعد يُمه شَـحِـط بالمَهَــد
شِيعَوِضْ اليِنوِخِذْ من عدها ابنها بعد
إو كل أم يـ يُمَـه تره عدها عزيز الوَلَد

ضلمه الدنيا ابعيني اخلافك
وخلافك ماشفت النور
ماچنت ادري الطف بي واحد
يذبح واحد ست اشهور
..........
يمه الدللو إلك صعبه عليك الجرح
وانته ازغر إمن السهم ماكو اعله گدك رُمِح
معقوله واحد عُمُر سِتْ اشهر إو ينذِبِح
ما أدري هِيچ الوَكِـت بالطف أبد مو سَمِح

أول مره يضل كاروكَّك
يِشبَه گلب امك مكسور
ماچنت ادري الطف بي واحد
يذبح واحد ست اشهور
........
عمرك اقل من سنه إو مُوتَك ولاينعقِل
مِتمَنِيَه مُوتَك الي وأنته ابمكاني عدل
يُمَه الجَرِح والعطش صعبه اعله گلب الطفل
واني ادري حر السهم يايمه ماينحمل

شمسوي وهيچ ايذبحونك
يوم العاشر من عاشور
ماچنت ادري الطف بي واحد
يذبح واحد ست اشهور
.........
يافرحة امك چنت واصبح غيابك حِزِن
من مهدك البي دِفُو خَلفْ الخِيَمْ تندفِن
إو مِنْ بين إدَيْ للگبر والگبر مابي حِضِن
و إخلافَك آنه أصبَحِتْ يايمه دمعه ابچفن

مو بالگاع اتمنيت أني
ابگلب امك گبرك محفور
ماچنت ادري الطف بي واحد
يذبح واحد ست اشهور
.........
عظم الله أجوركم باستشهاد ابي الاحرار الإمام الحسين عليه السلام

[Suzana]

عظم الله اجرك امير..شكرا ع النشر

[عضوية محجوبه]

شكرا جزيلا

[جَنـوبـيـة♡]

شُكراً جزيلاً أمير