هنا

[Suzana]

السلام عليكم
اكو موضوع حبيت اطرحه للجميع حتى لا تگولون الادارة دكتاتورية وحتى اخلص من هالقضية مثل متعرفون توجه الموقع انه نسمح بانتقاد الشخصيات السياسية لكن بكلمات مقبولة وبدون شتائم
لكن بعض المراقبين رافضين التوجه السياسي و الديني العام للاعضاء و يعتبروه هذا صار توجه المنتدى والمفروض الموقع يكون مُحايد

الاختلاف صار على الكلام و النقاشات في الكلمة وقسم النقاشات من ناحية انتقاد شخصيات سياسية مثل المالكي او العامري او الصدر .... الخ

لذلك طلبوا مني ان نعمل تعديلات بالقوانين تمنع المساس بالشخصيات السياسية

و نمنع التطرق للمواضيع الدينية او السياسية في موضوع الكلمة او اي موضوع من المواضيع المستمرة الي تحمل طابع المشاركات القصيرة

مُبررات الزملاء المراقبين ان هذه الامور تسوي فتنة وتفرقة بين الاعضاء ، و تثير حفيظة المحبين او جماهير الكتلة السياسية التي تنتقدون رؤسائها

ارائكم خصوصا واني متحملة مسؤولية الادارة امام الله وامام سامر و ماعندي اي مانع في اي توجه و لكن احب امشي مع ارائكم واللي تامرون بي يصير..

[انسان ثاني]

مرحبا سوزان
بالبداية سؤالي هو هل المنتدى سابقاً كان ذو توجه اسلامي ؟ سامر شخصياً منتمي بحزب معين وجاي يروجله ؟ خلي اجاوب اني ، لا سامر انسان محايد الى اقصى درجة وعمره ما قبل يروج لفئة مُعينة ضد اخرى

اني اعتقد انه الزملاء صار عدهم لبس بين الدين والسياسة وما يفرقون بين الاسلام السياسي و بين الدين الاسلامي ، اعتقد حتى اللاديني لازم يحترم اديان الناس بعتبارها حقوق شخصية وحريات ضمنتها كل الاعراف الدولية و المجتمعية

لكن الاسلام السياسي هو من اسمه ، توجه سياسي بصبغة دينية ، اني اليوم ميصير اطعن بالسيد علي السيستاني لانه رجل دين وعالم في مجاله لكن مقتدى و عمار و قيس هذوله سياسيين الموقف الي يتناسب مع مصالحي راح اوكف بي وياهم ومن تفرقنا المصالح راح انتقدهم و اشرهم ع حبل حالهم حال اي سياسي آخر

رجاءً لتسونه مثل مصر من حكمومهم الاخوان المسلمين ورادوا يخلفون مصر ويرجعوهم لعصر الجاهلية ، مصر ثارت على النظام الاخواني ، هل هذا يعني مصر شعب غير متدين او رافض الاسلام ؟ بالعكس وانما رفضوا تشويه الاسلام بالسياسة

ولي يصير بالعراق نفس الشيء حزب الدعوة (الاب الروحي لكل احزاب الاسلام الشيعي) هو نفس افكار الاخوان المسلمين ثنينهم منظرهم هو سيد قطب ، المالكي مو علي ابن ابي طالب حتى ما انتقده ! المالكي حاله حال عصام العريان الي چان يشوف مصر كلها خونه و تتامر ع الاخوان ، وبس هو الصح و مصر جزء من الدولة الاسلامية وما لازم تحكمهم حدود

شوفوا مصر هسه وين و وين چانت بعهد الاخوان


اني متعمد اخذت التجربة المصرية كـ مثال لان ماصارلها غير 10 سنوات وكلنه عاصرناها ، لازم نفرق بين الاسلام كـ دين و بين التوجه السياسي


اما رأيي في هذا الموضوع اني اشوفه من المُعيب ان ينطرح من شخصية معتدله مثلچ لان انتِ انسانة محترمة و محبوبة من قبل اغلب الاعضاء ، ومعنى كلامج هذا انه گاعد تخيرين الاعضاء تردون ابقى هيچ لو اتغير عليكم والبسلكم وجه ثاني وحتشوفوني ولائية و اقصائية وما اعترف بوجودكم اصلا واخلي بس صوت واحد بالمنتدى يظهر


و للعلم مادام صارت الموضوع (الاقصاء) مطروح للجميع اني هسه اطالبج بـ اسمي بعتباري عضو صارلي اكثر من 5 سنوات ومن حقي ان تنقذين مطلبي ، اطالب بمنع الولائيين وكل شخص يضوج من انتقاد الاصنام السياسية من التواجد بداخل المنتدى

اطالبج بعتبارج تردين تسمعين الاراء ، رجاءً رجاءً اي مراقب ولائي او عنده ميول اسلامية وما يعرف يكون حيادي لازم تطلعيه من الرقابة ، مثل ما اله حق يطالب بـ اسكاتنه اني هم اطالب بـ اسكاته

مادام هي دعوة و انرفعت فـ نخليها دعوة بدعوة و على المتضرر اللجوء الى القانون

[Aya']

عليكم السلام ست

برايي حرية التعبير والكلام مادامه مقبول افضل من التقييد
وبكيفكم بعد

[راهب]

مرحبا...
بسؤال بسيط: ما المختلف في درر العراق والذي دعانا ان نجتمع فيه على الرغم من وجود منصات عديدة يمكننا ان نسجل فيها وان نقول ما نريد؟
سجلت عام 2011 وما زلت ادخل هنا اضع ما بدا لي انه صحيح... ادخل هنا افرغ فكرتي التي تكون احياناً مخالفة واحايين كثيرة موافقة لما وافقنا عليه.... والادارة تفعل فعلها على وفق ذلك بما يخالف قوانينه...
سوزان وبكل المحبة لم ترد ان تكون دكتاتورية في رفض ما يطلبه بعض المراقبين... لكن...
ألا يشعر هؤلاء المراقبون بالدكتاتورية وان يفرضوا ارادتهم على الآخرين؟وهم يحاولون اسكات الآخرين عن نقد المنظومة السياسية التي يتفق اغلب الموجودين هنا انها منظومة فاسدة... ألسنا في زمن الديمقراطية؟؟ والديمقراطية تقتضي ان يقوم النقد قويًا متينًا لانه المقوّم لها؟؟
النقد صورة اخرى للنقض... وقد استعمل القرآن لغة النقض عندما شرع الانبياء برسالاتهم..
ولا احد فوق النقد طالما انه ليس إلهاً او معصوماً..
لا احد في العالم كله يمتلك الحقيقة الكاملة...
ليس على احد هنا ان يجبرني على الايمان بما يؤمن به هو... ان يفرض عليّ ما يقدس من اصنام، ان يقيّدني بالخط الاحمر الذي قيّد هو نفسه به... وان كنت تشعر بان حرفي ينال من سياسي مقدس عندك فلا تقرؤه..
لا اريد الاطالة.. لكنني لا اقبل ان تقمع اصواتنا في نقد اي سياسي فاسد او مؤسسة فاسدة...

ودمتم

[زاهــــد]

اني اشوف اغلب العراقيين حتى في حياتهم الواقعية يتناولون السياسة ويتطرقون في احاديثهم الى السياسيين سواء في الدفاع عنهم او نقدهم.
لذلك ارى ان يترك الامر على الحال الذي عليه الآن في المنتدى، وذلك في اقل تقدير ان يكون المنتدى متنفس للبعض في التفريج عن الكبت الذي يعتمل في الصدور اتجاه السياسيين للضرر الذي لحقهم بسببهم.
فقط الرموز الدينية يجب التحفظ على التعرض لهم بكلام الغير لائق.
شكرا سوزان كنتي في هذا الموضوع قمة الديمقراطية .

[الملاذ الاخير]

السلام عليكم وشكراً سوزان لمشاركتنا الاختيار وتقبل اراءنا
طبعاً رامي كفه ووفه وكلام زينه العقل
اللي حاب اطرحه الاتي :
لحد يحاول يفرض حبه وانتماءه السياسي على باقي الاعضاء .. كل عضو حر بطريقه تفكيره وتاثره اما بالنسبه للانتقادات للاحزاب الحاكمة ورجال الحكم سواء رجل دين وغاط بام الدوله والحكم او سياسي او اي فرد .. باعتباره مسؤول من حقي انتقده واسبه واطبح حظه واخلي بحاويه قمامة وهذا ابسط حقوقي ..
احنه من نتتقد ونحجي باسلوب ساخر باغلب الاوقات .. واكو مواضيع نعرفها بعيده عن الواقع وحتى الاداره نفسها تعرفها مواضيع بعيده جداً عن الواقع بس ندخل نقاش بيها ومرات يكون النقاش ساخر ومرات ياخذ الطابع التشنجي لبعض الاعضاء .. بس ينتهي الموضوع وينتهي كلشي وياه
اما اللي يشوف نفسه يضوج وماله خلك هيج مواضيع .. يكتفي بالابتعاد ورحم الله والديه مقدماً .
اتمنى من العضو اللي تقدم بشكوى بهذا الخصوص ان يكتفي بالابتعاد عن قسم النقاشات .. حتى لا يرى من يتبع او يوالي تحت المطرقة والسندان من الانتقادات .. لان كلنا نعرف ماكو سياسي بالعراق شريف كلهم سراق وايديهم ملطخة بدماء الابرياء .

[zeto]

أكو نائبة كردية حلوةعادي اصارحها هنا

[راهب]

أكو نائبة كردية حلوةعادي اصارحها هنا

هسة هاي بيا خانة انخليها سياسة وانتقاد لو حبجيات؟؟؟
زين اذا كانت هاي النائبة الكردية الحلوة.... ملّة؟؟؟
شلون بهاي؟؟؟

[وسـام]

ان حدث وطبق قرار المنع واقصاء الاراء لعيون المراقب صاحب الفكرة فأن هذه الخطوة سوف تكون بمثابة دق المسمار الاخير في نعش المنتدى
وشكرن

[دُعےـــآء]

وعليكم السلام حبيبتي

مو حلو التقييد.. احنه تعودنا هنا بدرر العراق ان نطرح افكارنا بمنتهى الحرية.. مو علمود شخص او شخصين ضاجوا نروح نخلي قيود.. واحنه العراقيين عايشين عيشه سوده مصخمة والسبب سياسيينا وفسادهم ومابيدنه شي غير انو ننتقدهم.. وماشفت بالمنتدى انو ننتقد فلان من السياسيين ونترك فلان خط احمر..كلهم ننتقدهم شلع قلع والگالها وياهم .. الشخص الي مايعجبه لا يقرأ الردود اي يتغاضى عنها وكأنما ماشاف شي..