زعل واله يلوگ الزعل حمل گمر هاشم حمل
يحيل الله دخيل الله شكثر شايل عزم
علي چنه الحرب فنه كسر ضهر الزلم
ذب اعله چتفه الرايه وجاب الفرات ومايه
والجيش تيه رايه من شاف شيال العلم
تجدح شرار عيونه ما گدروا يلاگونه
صال وركب ميمونه وتهلهل بضهره الخيم
اخذ جوده ومشه بزوده يطش بيها ويلم
علي چنه الحرب فنه كسر ضهر الزلم
فرو تصيح القاده طب لينه عم الساده
انه ابو فاضل ناده وتتنومس بسيفي الحرب
من غار بأول غاره خله الزلم طشاره
بالجيش فرغ ناره والماي مات من الرعب
غضب نازل نهر شايل كفو منه ونعم
علي چنه الحرب فنه كسر ضهر الزلم
عباس ابو الحنيه راضع وفه البدوية
من ينفض الخاچيه تذبح العايل خزرته
عباس ضهر اخوانه مهوال طب ميدانه
هذا انه صاح هنانه والجيش فز من خزرته
العده بحيره وأبو الغيره لزم بيده النجم
علي چنه الحرب فنه كسر ضهر الزلم
عباس راعي الغيره خلاها كلها بحيره
وأمره صعب تفسيره معروف عند الزمجره
عينه السهم طفاها والرايه ما هداها
كلمه ابفخر گالها گال أنه سبع الگنطره
اسد يزئر محه العسكر الو فاضل شهم
علي چنه الحرب فنه كسر ضهر الزلم
عالماي صار امدافع والجيش كله اتراجع
طب ليهه والشط نازع عباس رد جايب نهر
صفه الزلم والعسكر أمن الخيل بيهم شمر
والجيش وجها تغير من صال عباس الگمر
الحرب عيده اللوه بيده يصول ومبتسم
علي چنه الحرب فنه كسر ضهر الزلم
MP3
رد مع اقتباس