هنا

[الملاذ الاخير]

قصيدة : ضعن الهواشم .
اداء الرادود الحسيني : محمد الجنامي
كلمات الشاعر الحسيني : مصطفى العيساوي
محرم الحرام 1444هـ - 2022




للطف اجوني يالتنشدون
ضعن الهواشم وين يردون
شرفت گاعي هالميامين .. مجبل عليه ضعن الحسين
يالتنشدون .. يالتنشدون

بالتحدي بضعون الاهل تمهل
حط الرحال بدارنا وتفضل
تسالون عني واني عنكم اسال
انه اسم گاعي كربلة شرفتوا الاتراب
حتى الهوة جنت اساله عنكم يغياب
حي الله من يانه وهلة بضعون الاحباب
كل ذره من ترابي تصيح
يوميه انشد عنكم الريح
انتظر جيته صارلي سنين .. مجبل عليه ضعن الحسين
يالتنشدون .. يالتنشدون

ريض يحادي والارض ارضكم
افرش الگاع ودگ وتد خيمكم
خلي يرف فوگ السمه علمكم
يا اهل المعاني والشرف ياساده الگوم
مابيكم اليگعد طرف ديوان معلوم
يالبيكم الباري انعرف ياباب العلوم
حتى الهوة ظل يهتف وياي
ميه هلة يا ساده الماي
يا سر حياه الماي والطين .. مجبل عليه ضعن الحسين
يالتنشدون .. يالتنشدون

يانوگ ريضي ابمشيه المحامل
زينب اجت يبرالها ابو فاضل
وكربله تنادي والنعم يكافل
عباس مد جفك سمه يالكلك فياي
يالذابح بسيفك ضمه يكبر من الماي
الماشافك بعينه العمة يانور عيناي
كل شبر مني يصيح با احساس
مشتاگة لجفوك يعباس
يالبيك ريحة ام البنين .. مجبل عليه ضعن الحسين
يالتنشدون .. يالتنشدون

عباس فوگ الغيم دگ علمها
حگها اتباها زينب انته يمها
حتى الهوة ما يوصل لخيمها
شتوافي گاعي لو حجت يالكلك اعجاز
لغيرك يكافل من اجت ما اظنها تعتاز
والعدها مثلك ما بجت دمعاتها اعزاز
التاريخ عنك سولف وگال
شاره سلف يا شيخ الارجال
شاهد كلامي بهالكلمتين .. مجبل عليه ضعن الحسين
يالتنشدون .. يالتنشدون

اخر كلام بدمعتي ووداعي
ربك كتب هذا الاجل يناعي
بعاشر محرم معركة اعلة گاعي
اتمنيت ما يطلع صبح ولا شوفن اشصار
كل بني هاشم تنذبح وياها الانصار
تصعد الروس اعلة الروح وخيامها بنار
زينب تروح بضعن للشام
وحسين يمي مغطة بسهام
راس برمح ويه النساوين .. مجبل عليه ضعن الحسين
يالتنشدون .. يالتنشدون




للاستماع الصوتي
MP3


تدوين ( احمد الگرعاوي )
حصرياً لمنتديات درر العراق

[❀ فتافيت السڪر ❀]

مأجورين ومثابين ،، أحسنت الطرح والتدوين خالو
في ميزان حسناتك يارب ،،يعطيك العافية
موفق

[الملاذ الاخير]

مأجورين ومثابين ،، أحسنت الطرح والتدوين خالو
في ميزان حسناتك يارب ،،يعطيك العافية
موفق

انرتِ خالو .. ربي يسلمج يا طيبة
ممتن