ليلة ادموع ..تذبح ابروحي المدامع گطرة گطرة
وني مسموع .. الليلة تسترنه الخيم وباچر اسره
ها يليل .. وما أجت هاي اعلى بالي
ها يليل .. ابيا ذنب جاوب سؤالي !
ها يليل اجروحي لوحة
وحزنك اعله انطوه
روحي جمرة وماكو گمرة ودور اعليها الهوه
طول انفاسك يليلي
صبح ادري ابلا ضوه
انه عطشانة اعلى اهلي
وگلبي ما منهم روه
يازماني .. اشما اعاتب ادري ماينفع عتابي
يازماني .. شنهو ثارك ببه ويفرحك عذابي!
وها يليل ابيا بخت تگطع وصالي
ها يليل ابيا ذنب جاوب سؤالي
ليلة ادموع ... ليلة ادموع
وصفت ابعيني المدامع
وانتَ ماترحم بشر
هيجت بيه المواجع
بعترافك يادهر
باچر اتعيش ابخيالي
وبيه تزرعها القدر
تنمحي كل ذكرياتي
وتبقى من هاي الصور
وياروحي .. عيشي ميته من عگب اهلچ يروحي
وياروحي .. ذكري منهم ذني ضللج جروحي
وها ليل .. اعلى اليتم ماخذ عيالي
وها ليل .. ابيا ذنب جاوب سؤالي
ليلة ادموع ... ليلة ادموع
يازمن باچر نويت اعلى اليسر وعلى الذبح
تطحن احسين الخيول
ووجهه يصفر عالرمح
باچر اتموت الثواني
ونبقى نحسب چم جرح
ابصبحك اسود ها يـ ليلي
ويبقى اسود ياصبح
ماتهزك .. دمعة اسكينه ورقية وهذا حالي
ماتهزك .. جامد احساسك يـ ليلي ماتبالي!
وها ليل .. الظلمت كل الليالي
ها ليل .. ابيا ذنب جاوب سؤالي
ليلة ادموع ... ليلة ادموع
باچر اوداع الغوالي
باچر اتطيح الخيم
يادموع اتكفي عيني
شيبني حيلي اللي انهدم!شطفي ناري وكل حنيني
بيه شوغات وألم
ها يدهري ابـ هالمواجع
وشينفعك ياندم
ياحسافة .. حيلي مات وصعبة اطبگ حتى رمشي
ياحسافة .. يتشمت شمر وبطوله يمشي
وهل يليل .. اندارت الدنية اعلى حالي
وها ليل .. جاوب سؤالي
ليلة ادموع .. ليلة ادموع
---------------------------------------------------
كلمات الشاعر : زهير الابراهيمي
القصيدة كُتبت حصرياً لموقع دُرر العراق
ZahraaAlobaidi
رد مع اقتباس
