هنا

[انسان ثاني]

الله ..
ذكرتني بأبو ( المنكاش )
وفعلا .. شيئاً ما مر من أمامي مسرعا .. شيئاً ربما كان عُمري "
أحبك ..

فدوة لعمرك
حبيب قلبي حمودي

[فـرح]

[/QUOTE]

شوية فضفضة




صار كم يوم عندي ظرف اجبرني ع سفر لمكان بعيد عن بيتي ، صار عندي وقت اگعد بالفندق و اتامل بالسقف لان ماعندي شيء اسويه ، اليوم واني دا احسب بالمربعات الي بالسقف الثانوي سرحت بالتفكير ، حسيت روحي كبرت هواي ، بلشت استثقل السفر و الابتعاد عن البيت ، صرت روتيني اكثر احن لغرفتي ، اريد ارجع بعد نهار طويل لبيتي ولغرفتي ، احس هذا مو مكاني ، احس نفسي ما عندي حرية ان اسوي الاشياء الي اريدها بـ اي وقت ، صارت عندي مسؤولية عائلة ، صارت عندي مسؤوليات اجتماعية ، الي يصير عنده حزن لازم اروح و اواسيه و الي يفرح اروح واهنيه ، احس روحي مو نفسه رامي القديم ، چنت اسوي اي شيء يخطر ع بالي بدون ما احسب حسابات معقدة ، مثلاً چنت من اشوف بنية حلوة اروح و اگلها انتِ كلش حلوة واتمنى نصير اصدقاء ، هسه من اشوف بنية حلوة عادي مالي خلك احچي وياها اصلاً ، هل شيء يحسسك انك كبرت فعلاً ، چنت استغرب من واحد يسولف عن حادثة مرت عليها 20 لو 25 سنة ويضحك ، هسه من اتذكر حادثة قبل عشرين سنة افكر بسرعة يااااااه معقول اني هلگد عشت ! معقول هلگد مرت بسرعة !

الموضوع مو فقدان الشغف او الخوف من الكبر ، ولا الحنين للماضي و لأيام المراهقة ، احس الموضوع اعمق ، الموضوع هو عبارة عن ترتيب اولويات ، يعني قبل خمسة عشر سنة چنت اشوف اكو هواي اشياء مهمة هسه احسها تافهة ، چان عندي هواي اصدقاء اليوم قليلين جداً ، چنت هواي اناقش الناس هسه غالبا الي يحب يناقشني ارد عليه مرة او مرتين و بعدها اگله انت صح ، چنه نسهر هواي بالنوادي الليلة اني واصدقائي وهسه صرنا نفضل ان نسهر ببيت واحد ، چان مفهوم السهر عدنا يرتبط بالصخب بسبب موسيقى النايت كلاب او الحفلات و هسه اذا صوت التلفزيون عالي واحد يگول للثاني نصيه ، قبل بكل سهراتنا لازم اكو مشروبات روحية هسه صرنا ندور گهوة و كبتشينو و يا محلاها لو اكو بليستيشن و نلعب ونضحك من گلبنا و الي يخسر يصير بطل المسرحية

چنه نرتب قبل السفرة بـ ايام وهسه بيوم السفر يلا نجهز جنطتنا وغالبا ننسى شغلات مهمة و نضطر نشتريها من غير مكان ، ايام قبل حلوة بس اعتقد لمرحلة معينة يعني حلوة لانها بذاك الوقت ، و ايام هسه هم حلوة بس لو مسويها قبل چان حتصير كلش مُملة ، اني خايف من شيء واحد انه بعد 10 لو 20 سنة اصير اتذكر ايام هسه و احنلها ، معناها راح اكون منعزل و بعيد عن الناس و اني بعمري ما چنت هيچ ولا احب اصير هيچ بيوم .....

[انسان ثاني]

من المظاهر السلبية في مجتمعي




دائماً تشوف اكو شخص يحب ينتقد الناس وهو ماشي بالشارع وهو ماشي بالمول وهو گاعد بكافيه ، يحب ينتقد ع كل شي شون هذا الولد شون نافخ نفسه شوف هاي البنية لابسة حصر تريد تلم الشباب شوف هذا الشايب شلون مبهذل ، تعليقات ما تخلص ، بس ابداً ما فكر بيوم يخلي نفسه بمكانهم ، الشاب الي نافخ نفسه هو شاب عنده نظام صحي تعبان ع نفسه يومية يروح للجيم و يجتهد حتى يحسن من مظهره و للعلم مظهره يخصه اله لان هو حاب هيچ انت شنو مشكلتك ! البنية الي تلبس حصر هي ثقافتها هيچ هي تحب تكون دائما جميلة ، بس تره ما مسويه هيچ لخاطر عيونك يا ابو عيون جريئة بس لان كل شخص بداخله يطمح للأعلى و هي هيچ حابة تصير انت شنو الي غاثك ! الله انطاك عقل حاول تشغله تره هاي ميزة ميزك بيها عن الحيوان ليش مُصر تتخلى عنها ! خلي الناس تسوي الي تريده ، اذا انت مُتدين غض بصرك واذا انت ما الك واهس بالرياضة (مثل المتحدث) گول ما شاء الله هذا الولد تعبان ع نفسه ، تره هاي التعليقات ماتدل ع شيء غير انك مريض نفسياً ولأنك فاشل ومحد مگلبك تريد الناس كلها تصير مثل يا فاشل يا فاشل ^_* ، اكو مثل كلش حلو يگلك : الكل مؤمن حتى تأتي العاهرة ، الكل مُلحد حتى تسقط الطائرة ، الكل شيوعي حتى يأتي المال ، الكل ثوري حتى تأتي الهجرة

الفكرة من المثل يگلك خلي نفسك بمكان الي تنتقده و راح تشوف بنفسك شنو ردة فعلك اذا شفت شخص يجي وينتقدك بس لانك ما عاجبه ، صدگني راح يكون شعور سيء جداً

[انسان ثاني]

مساوء العيش في الانظمة الطبقية




اذا چان عندك هدف تريد توصله ، تعلم شون تعيش لوحدك بهذا الطريق ، صحيح وجود اشخاص بقربك تحبهم ويحبوك راح يساهم بشكل ايجابي في بلوغك الهدف لكن لو فرضنا ماكو هيچ اشخاص ! لا توهم نفسك وتقرب منك اشخاص بس حتى لا تستوحش في الطريق ، احنه بزمن المقابل ما يحبلك الخير مو لانه انسان سيء بس هذا العالم الطبقي الرأس مالي الي احنه دنعيش بي من مساوئه انه المقابل يريد الخير بس اله واذا هو ما بي خير يريد يشوف الناس كلها مثله ، احنه بزمن اذا واحد شاف شخص گاعد يمدح شخص ثاني بصفاة (هو يشوف هل مديح لازم يكون اله) راح يوصف هل مديح بالتملق و الازدواجية ، مايتقبل انه الممدوح قد تكون فعلاً هذه الصفاة الحلوة موجودة بي !
امشي بطريقك صديقي والي يزعل منك خلي يزعل الدنيا ما توگف عليه خليك انسان جشع في مصلحتك احياناً الجشع مطلوب حتى لا تدوس ع نفسك لأرضاء غيرك ، امشي و باوع لهدفك ولا تهتم بنقد الي حولك ، صدگني من توصل هدفك راح تشوفهم يصفگولك ، ولا تستغرب لو اكو اشخاص من الي زعلوا عليك لو انتقدوك واحبطوك راح يتبنون نجاحك ويگولون احنه ساهمنا بجزء منه ، تعلم شون تعيش بهذا العالم الجديد ، عالم مادي بشكل كبير و قليلة جداً بيه العواطف .....

[انسان ثاني]

انتشار المخدرات في العراق




ذاك اليوم دا نسولف اني واصدقائي وتذكرنا مراهقتنا و حمدنا ربنا انه ما چان اكو مخدرات بشكل منتشر مثل هسه ، چنا بس نسمع بالكبسلة بس ما شايفيها ، و چان الشيء المتوفر فقط التدخين و المشروبات الكحولية و الحمد لله هذني مابيهن ادمان مثل ادمان المخدر
قريت احصائية عراقية تگول وصلت نسبة التعاطي بين الشباب اكثر من 40٪ ، تره رقم مرعب !

الي يثير فضولي شمعنى المخدرات انتشرت في الطبقة الفقيرة ؟ المعروف دائما ولد الاغنياء هم الي يتجهون لهذا السم ، بعدين منين ديجيبون كل هاي فلوس التعاطي ! تره شيء غريب يخليك تصفن وما توصل لجواب !!

[انسان ثاني]

الشعور بـ الاكتفاء




من اني مراهق اعتمدت ع نفسي بالشغل و غادرت بيت اهلي وسكنت بمدينة ثانية لوحدي حتى اشتغل ، چان عندي شغف اريد اجرب شعور ان اكون مسؤول عن نفسي بعيداً عن والدي رحمه الله ، اشتغلت مدير مشتريات و بتجارة العدد اليدوية و تجارة المكائن الزراعية و تربية العجول و الزراعة و دخلت بشغلة العقارات ، ما عدى قضية جانبية چنت امارسها كـ هواية وهي بيع وشراء الاسهم ، و درست كلية و تخرجت ، حالتي المادية چانت جيدة ، طبعاً كل الدخل الي يطلعلي چان الي بس ، وما چنت اعرف ادخر المال ، كلما اجمعلي كم فلس اخذهن و اسافر بيهن واتونس ، زرت هواي اماكن ، تعرفت ع ثقافات ، و الاحلى بالنسبة الي انه تعرفت ع اشخاص جدد ، بس انظر لنفسي هسه احسد روحي اگول شون چان الي هيچ خلگ ، مع العلم اني بعدني ماصرت شايب ، بس احس انطفت شعلة الحماس للتجارب الجديدة بداخلي ، صرت هواي احسب حسابات بداخلي لكل خطوة ، من افكر هسه اگول شعجب وصلت هذه المرحلة من وكت ! ، المفروض ابلش احس هيچ من اصير بالخمسينات او الستينات ، ما اعرف بس احس اصلا العيش بالعراق و بوسط هذه الظروف يخليك تكبر بسرعة و كأنما اكتفيت من هذه الدنيا بكل بساطة ! ....

[انسان ثاني]

ذكرياتي مع رمضان




واني في بداية العشرينات قررت اصوم رمضان بشكل صحيح ، لان سابقاً ما چنت اصوم بشكل كامل احتمال اصوملي يومين لو ثلاثة و اعطش واريد ادخن فـ افطر ، بس بهذه السنة قررت التزم بالصيام ومع التزامي بالصيام اضطريت ابقى گاعد بالبيت لفترات طويلة كلش حتى ما اطلع واعطش ، فـ چان عندي شغلتين اسويهن ، العب بلي ستيشن و اقرأ كتب بالنت ، هنا قررت اقرا كتب دينية حتى الگه اجوبه لهواي اسئلة براسي عن موضوع الصيام و شنو المغزى منه

المهم اثناء القراءة بالكُتب السنية و الشيعية انحرف موضوع بحثي الى موضوع آخر ، بلشت اشوف الوصف الي يصفون بي النبي و اهل بيته و صحابته بشكل يصدمك من القراءة الاولى !

اكو امور اذا تتعمق بيها فعلاً تگول حقهم الغرب يطلعون النبي بهذه الصورة الي تزعجنا و تهين مُقدساتنا لان هم جايبين هل افكار من كتب التراث الاسلامي ، التراث الاسلامي احنه المسؤولين عن تشويهه لانه جعلنا من بعض الكُتب مُقدسة ، الاسلام المفروص يكون انظف و انصح من الاسلام الموجود بالكتب

اكثر ما استفزني من يسولفون بعلاقات النبي بالنساء ، ان كانوا زوجاته او جارياته ، اشوف بيها اهانة چبيرة لفكرة النبوة و اهانة چبيرة للمرأة و اهانة چبيرة لدين الله بعثه رحمة للعالمين و اهانة لكل قاريء من يقرأ عن حيض نساء النبي و غيرتهن من بعض و شلون النبي يهدوله جاريات فـ يختار الي تعجبه و يهدي البقية لـ اصحابه ، النبي محمد الي بعقلي انزه من هيج تصرفات ، هاي تصرفات تجار بشر مو انبياء و حاشاه للنبي من هيج افعال ، بعدين الي نقلوا الحديث شگد فارغين عايف تعاليم الدين و علمية النبي وجاي يسولف عن نساءه ، معقولة اكو هيج تفاهة !

يا اخوان هذا الكلام موجود بالكتب السنية و الشيعية وما ذكرت اسم الكتب حتى لا اضوج اي طرف بس الي يحب خلي يبحث بنفسه عن الحوادث الي ذكرتها و خلي ينصدم ، هذه السموم موجودة في تراثنا ، اذا ما ننقح هذا التراث لحد يزعل اذا الغرب ينتجون فيلم عن النبي ويطلعوه بس ملتهي بالنساء ، لانه كتبنا هيچ تگول !

مشكلة الكتب للطرفين السنة و الشيعة كلهم يردون ينصرون جماعتهم و بين علي و عمر ضاعت قدسية مُحمـــــد !

[انسان ثاني]

الضجة الاعلامية حول المسلسل الكويتي (دُفعة لندن)




اني بصراحة مو مُتابع للدراما بس حسب الي فهمته من مواقع التواصل الاجتماعي انه المسلسل مطلع شخصية عراقية تشتغل مُدبرة منزل في بيت كويتي و تُعامل بطريقة غير انسانية وهذا ما اشعل وسائل التواصل الاجتماعي و بدأت الحرب الاعلامية بين الشعبين و هذه الحرب تقريباً في كل سنة تظهر في شهر رمضان

العتب الاول على الكويت الي لحد الان ماگدروا يتجاوزون هذه المحنة الي سببها الهم نظام الحُكم في العراق (سابقاً) و طريقة معالجتهم للمشكلة كانت خاطئة جداً ، هم خصمهم نظام الحكم لكن انتقامهم اصبح ينصب على الشعب العراقي ، وهذا ان يدل فهو دليل واضح على ضيق آفق الكتاب الكويتين ، كلش فرحت من شفت تلاحم الشعبين في بطولة الخليجي و چنت اعتقد هذه هي النقطة الفاصلة الي راح تنهي هذه الاحقاد بين الشقيقين ، لكن مع الاسف لازالت الامراض النفسية تُسيطر على ساحة النخبة في الكويت الحبيبة

اما عتبي الثاني على شبابنا العراقين الي اختاروا الرد بالطريقة الخاطئة وهو التغني والتمجيد بـ غزو الكويت و مدح المقبور صدام حسين و كأنه سوه انجاز عظيم من احتل دولة مُسالمة بيوم وليلة ، صديقي الي تتغنى بصدام انت تقريباً ما لحگت عليه ، وان لحگت فـ هذه فعلته مدعاة للخزي و العار من تتغنى بظالم قتل شعبه وادخلهم حروب عبثية لحد الان الاجيال الصاعدة گاعد تسدد فواتير حماقاته ، مابيها رجولة من القوي يقتل الضعيف والا امريكا خير رجال الارض من حطموا هيروشيما و من احتلوا بغداد ، فكر بكل موقف قبل لا تتخذه لا تخلي اندفاعك وتعصبك يخليك تصف مع الظالم ، الكويت غلطانين بـ اظهار هذه الصورة السيئة عن العراقين و لكن انت هم غلطان من تذكرهم بجرح عميق سببه الهم نظام مجرم واول اجرامه كان بحقك من خلاك تتخلف سنين ضوئية ، نظامك الي تتغنى بي شنو قدملك ؟ شو الكويت اقوى منك اقتصادياً و سياسياً و تعليمياً و صحياً و مستوى معيشي ، المفروض من تتباهى تتباهى بشيء يسوى التباهي ، انت مو بالعصر الجاهلي حتى تتباهى منو يگدر يقتل منو ومنو يگدر يعتدي ع اعراض الثاني اكثر

شوية ارتقوا القاع مو بس ازدحم و انما صدگوني ما بقى بي مكان لهذه الاجيال ، اتركوا القاع لمن سبقوا بالتخلف ، كلامي للشعبين ، عيشوا بسلام انتوا جيران كافي تخلف و كافي بكاء على الاطلال

[انسان ثاني]

مُشكلة الفرد العراقي مع فكرة الانتماء للوطن





منو ملاحظ تقلبات الشخصية العراقية خاصة في موضوع الولاءات ؟ خلي نسولف عن آخر عشرين سنة فقط ، نجي ع اطراف المُعادلة و نحللهم طرف طرف ، الشيعة چانوا كلش يميلون لـ أيران و يعتبروهم عُمقهم الستراتيجي و العقائدي و السُنة يميلون بشكل عام للخليج العربي و تركيا و بالخصوص للسعودية ويعتبروهم عمقهم العربي و الاكراد منقسمين بين ايران و تركيا و امريكا وسبب انقسامهم حتى يضمنون امنهم و يشتغلون على مشروع انفصالهم

بعدها بفترة بلشت الحرب الطائفية بين السُنة و الشيعة بينما الاكراد بقوا على الحياد ، و بلشت تطلع اصوات الاقليم السُني وهم انضحك على المساكين السُنة من قبل قادتهم السياسيين ، بعد 2016 صار تحول بالبيت الشيعي و انقلاب على ايران بعد ما ساعدتهم بمحاربة داعش ، بل وحتى صار تحالف سني شيعي ضد الاكراد من صار الاستفتاء و الكل دعم حيدر العبادي بفكرة استعادة كركوك بالقوة العسكرية

بعدها اجت ثورة تشرين و كان شعارها نريد وطن و كانت شيعية الغطاء و السنة يخافون يشاركون بيها بـ مناطقهم لان خطية يدرون بالقادة الشيعة راح يختلفون عليهم ويسوهم ارهابين

بعدها صار تحالف سني شيعي كردي بـ انتخابات 2022 و فشل هل تحالف بسبب بعض الشيعة وبعض السنة وبعض الكرد

بعدها صارت كأس الخليج و شفنا حفاوة الاستقبال من العراقين بكل طوائفهم و تحالفوا مرة اخرى حتى ينطون اجمل صورة عن العراق و صار كلام عساس نستقبل اخوانا العرب و هذا امتداد لعمقنا العربي و اصالتنا

و اخيراً وصلنه لـ اتفاق ايران والسعودية و السعودية قدمت قربان و اوقفوا مسلسل معاوية الي راد ياجج الطائفية مرة ثانية و صار تحالف شيعي سني و الامور طيبة والكل بخير (لحد الان)

شايفين كل هاي التقلبات ؟ تره هاي تقلبات المفروض تاخذ قرون من الزمن حتى تتم بس بالعراق كلشي عدنا سريع

زين ما ملاحظين محد جاب طاري العراق بشعاراته بكل هل تقلبات غير شباب تشرين الابطال ؟ محد لاحظ انه الكل يبحث عن مصلحة شخصية ومابيهم واحد فكر يعمر بيته الي گاعد بي ؟ ما هو بيتك مهدم و ماكلته الرطوبة شتستفاد بالفلوس الي بجيبك وانت ما تريد تصرف عليه ؟

بس اني عندي تفسير لكل هل تقلبات ، واكيد راح يزعل مني هواي ناس ، حسب احصائيات اليونسكو تگول اهل العراق الحقيقيين مايمثلون نسبة اكثر من 1_5٪ ، يعني كلنه وبما بينا المتحدث مو عراقين ، احنه كلنه عرب اجينه ويا الغزو الاسلامي لهذه الحضارة العراقية و لاحظ عزيزي القاريء استخدمت مُصطلع غزو مو فتح لان العرب غزوا العراق و استباحوا ارضه و دمروا حضارته

هنا اقصد السنة و الشيعة ، بينما الكرد هم شعب مظلوم لانهم اصحاب الارص الحقيقيين بس قسمتهم السياسة و طشرتهم بين ايران والعراق وتركيا و سوريا ، فـ خلونه نطلعهم خارج المُعادلة

تاريخ العراق يمتد لـ اكثر من 5000 سنة ق.م ، محد انتبه انه من دخلوا العرب ليومك هذا ما قدموا شيء مثل ما قدمت حضارة سومر لو اور لو اشور لو الكلدان لو لو لو.... الخ ، اعظم شي صار هو ابو جعفر من بنى بغداد و سواها عاصمة الدولة العباسية ، و حتى من بناها مو حباً بالبلد وانما لموقعها الجغرافي في قلب الشرق الاوسط و لكثرة خيراتها

العراقين الحقيقيين الي موجودين حالياً الي تمتد اصولهم لـ سومر هم سكان الاهوار ، نعم صديقي الشروگي هو صاحب الفضل عليك هو الي استقبلك بـ ارضه هو الي جاي تتمتع بخيره و بنفس الوقت انت محاربه و تقصيه من حقوقه في العيش المريح و توفير فرص العمل و تقطع عنه الماء حتى تنشف الاهوار الي هي مصدر رزقه ، حسب الابحاث ان سكان الاهوار هم اهل العراق الحقيقيين هم الي ملامحهم نفس ملامح حمورابي و كلكامش وهم الي يستخدمون الكلمات السومرية لحد الان ومن اهم مُفرداتهم (چا) الي تعني حبيبي بالسومرية

يعني حقهم العراقين اليوم من يفكرون شون يترسون جيوبهم و يستغلون خيرات العراق لان مابيهم واحد گلبه على هاي الگاع ما بيهم واحد حاس بـ انتماء لـ ارضه وشعبه ، احنه مجرد قبائل همجية دخلت قصر و گالت يحرم عليه اطلع منه قبل لا اهده للگاع و اسوي خيمتي الي اجيت منها تصير احلى منه

الك الله يا عراق ......

[انسان ثاني]

الشهيد ابو بكر السامرائي







قبل كم يوم طلعلي اقتراح باليوتيوب عن برنامج للمذيعة منى سامي مصورة حلقة مع آسرة الشهيد ابو بكر السامرائي ، الضابط الي قتلوه داعش اثناء احتلالهم للمدن العراقية ، كمية الألم الي شفته بعين ام الشهيد ما ينوصف رغم مرور 7 سنوات على حادثة استشهاده ، الابن والاخ تعايشوا مع الوضع و تقبلوا الامر لكن امه تحچي عنه كانه اليوم فقدته ، مستحيل احد يگدر يواسي ام او يشعر بمشاعرها اتجاه فقدان الابن ، شگد عدنا امهات عاشوا نفس شعور ام الشهيد ابو بكر ، اني اعتقد انه الابن من يموت ما يموت لوحدة وانما يبدأ بشكل تدريجي ياخذ من ايام امه يوم تلو الآخر الى ان هي تلحق بي ، سبحان الله شون خله هذه الرابطة بين الام و ابنها ، اعتقد اسوء شيء للأم ان تشوف وفاة ابنها بعينها مهما كبرت و مرت بتجارب بس نقطة النهاية هي موت الابن ، الله يرحم ابنها و يرحم كل شهداء العراق و يمسح على قلوبهم برفقه و رحمته

اكو رواية بيها جزء كلش حلو ينطبق على كل شهيد وامه

مرّت أختي من أمامي
نظرت إليّ ثم مضت دون كلام
وأخي الصغير إرتطمت كرته برأسي
التقطها ولم يعتذر
حتى أبي كلما نظر إليّ يشيح بوجهه بعيدًا
وحدها أمي تجلس على الأريكة المُقابلة
تنظر إليّ وتقول : متى تعود ؟
وأنا مُعلّق على الحائط أمسك بإطار
الصورة وأتمنى أن أخرج منها !