المشاركة الأصلية كتبت بواسطة انسان ثاني
التعصب
التعصب بشكل عام فكرة منبوذة بالنسبة الي ، اتذكر بطفولتي چنت متعصب بتشجيع ريال مدريد بس كل الي حولي معجبين بطريقة لعب (رونالدينهو) لاعب برشلونة ، يصفوه بالساحر ، اني استغرب شون هيج يصفون خصمي ! ، بس بعد فترة بلشت اشوف لعبات برشلونة و فعلا گمت احب اسلوب رونالدينهو ، بلشت اكتشف چانت اكو هواي اشياء حلوة فايتتني بسبب تعصبي غير المبرر ، بلشت اضحك ع عقل اي شخص اشوف عنده تعصب
تتعصب بالدين راح تفقد ملذات الحياة
تتعصب بالكرة راح تفقد متعة مشاهدة باقي الفرق
تتعصب بالسياسة راح تتحول لعبد تسجد لمجموعة سياسية وبالنهاية اكيد عدهم اخطاء
تتعصب بالحب راح تتملك حبيبتك وتمحي عالمها و تشكلها حسب الي تريدة انت ومو مهم هي حابه هل شي لو لا
التعصب بحد ذاته راح يخليك انسان متخلف ما تعرف تواكب التطور ، مو غلط من واحد يكلك انت انسان متقلب و كل يوم برأي ، بالعكس هذا هو الصح لان الي تعرفه اليوم اقل من الي راح تعرفه باچر ، انت عبارة عن مجموعة تجارب و هذه التجارب لازم تغيرك للأحسن واذا بقيت مثل ما انت معناها بيك شيء غلط
المحصلة ، المتعصب انسان منبوذ رجعي متخلف ، يبقى يردد نفس الكلام و نفس الفكرة كل يوم بحيث الي حوله يملون منه وياخذوه ع گد عقله بس هو يعتقد انه خلص اقنعهم بكلامه و يشوفه انتصار شخصي اله ، وغالباً ما راح يكتشف الحقيقة الى ان يموت ، فتح عقلك حتى لا تموت وانت مضحوك عليك من قبل كل الي حولك
رد مع اقتباس
