موقف مُضحك
مرة من المرات سافرنا اني و صديقي من مطار بغداد و چانت سفرتنه كم يوم فـ قررنا نروح للمطار بسيارتنا ونتركها بالمطار ومن نرجع ناخذها احسن ما نروح تكسي
سافرنا و بالرجعة سلمنا الجنط و بقينه نفتر بالسوق الحُرة ، صديقي شاف عارضين بطالة (واين) گال خلي اخذلي بطلين ذني خوش نوعية و اعتقهن بالبيت ، گتله يمعود فشلة الطيارة كلها عراقين و تمشي وانت شايل علاگة بيها خمور ، گال يابه غلس منو ينتبه بهل زلگ
نزلنه بمطار بغداد وهو شايل العلاگة بـ ايده ، استلمنه الجنط گتله لك بابا خليهن بالجنطة مو فشلة گال يمعود السيارة تبعد عنا 100م امشي نروح بسرعة محد ينتبه ، مطار بغداد طابقين و القادمين يجون ع طابق الارضي و سيارتنا بالطابق الثاني ، گلي تعال نطلع بره ونصعد للگراج گتله لا تعال نصعد بالدرج الكهربائي للقاعة الفوگ و نطلع لسيارتنا ، هو لح عليه واني قفلت الا نصعد لفوك ، المهم حچايتي الي مشت و صعدنه و چان نشوف القاعة الفوگ متروسة مسافرين
المشكلة مو اي مسافرين ، كلهم لابسين ابيض طلع هذا وقت الحج و الجماعة رايحين لمكة ، اني امشي ومسيطر وصديقي يمشي ورايه ، ما اسمع غير صوت زجاج انرگع بالگاع ، انداريت طلعت علاگة البطاله انشگت من وحدها و وگع بطل الواين و تكسر والگاع صارت كلها واين و ريحته وصلت للسما ، والحجاج يباوعونا و يستغفرون و يهمسون بس شون نظرات ، اني بلشت اصغر اكثر فـ اكثر فـ اكثر ههههه ، صديقي يصيح مو گتلك اكو ابغداد عصير رمان هسه هيج زين ! الا تشتري عصائر من المطار
واحد من الحجاج گله عمو دروح الله يهديك شنو زواج گدامك وما نميز بالريحة ! ، طلعنه نركض للسيارة صدگ الاعوج ربك يوگعه مهما سلكت اموره الا يتفشل ههههه
رد مع اقتباس
المشاركة الأصلية كتبت بواسطة انسان ثاني
