هل الله موجود فعلاً ....؟
سؤال چان هواي يخطر على بالي ، من فترة المُراهقة و بلشت احب اقرا بهذا الخصوص ، چان العراق يمر بفترة الحرب الطائفية المقيتة ، چنت اتسائل معقولة كل هذولة القتلة ينفذون كلام الله ؟ ، هل الله دموي لهذا الحد ؟
المشكلة الي لاحظتها بهذاك الوقت انه چان ما تگدر تسأل بهل موضوع ، او مجرد التفكير بهل موضوع يرعبك نفسياً ، ماكو احد ممكن يتقبل سؤالك بداعي البحث الحقيقي ، اعتقد هذه معضلة مر بيها اغلب الشباب من يحسون ان افكارهم خارجة عن المألوف لذلك نبلش نبحث لوحدنه ، اكو الي يوصل فعلاً و اكو الي يبقى يبحث و اكو الي يقتنع انه ماكو الله و يتصالح مع ذاته
بس اكو فرق مهم قبل ان تبلش البحث ، لازم تسأل نفسك انت تريد تبحث حتى تقتنع بالفكرة لو تريد تبحث حتى تنسف فكرة وجود الآله ! اكو فرق كبير لانك قبل ما تبلش البحث راح تكون متحيز لأحد الطرفين ، ان كنت تريد تبحث للاقتناع راح تدور بكتب الاسلاميين او الدينيين أي كانت ديانتك ، واذا تريد تنفي وجود الله راح تروح بسرعة لكتابات المُلحدين ، واي الطريقين راح تسلكه فـ انت راح تقتنع بكلامهم
بس اني اتخذت فكرة الوسطية ، جربت مرة اقرا كتاب لـ اسلامي و مرة اقرا للملحدين (في وقتها كانت مقالات لان ماكو هواي كتب منتشرة عربيا عن الالحاد) ، حاولت ابحث بالنت عن كتب الاسلاميين ، بالطريق قريت لـ ابن تيمية و اصعقت بالدموية و بلشت تصير عندي ردود فعل من الاسلام (أثر علي عكساً) قريت معالم في الطريق و ظلال في القران لسيد قطب و كرهت شي اسمه اسلام ، بهذا العمر كنت ما اعرف منو ابن تيمية او سيد قطب بس لشهرتهم قريتلهم ، جابت ويايه نتائج عكسية ، بلشت اقرا فلسفتنا و الاسس المنطقية للأستقراء لمحمد باقر الصدر ، طبعاً ما اخفيكم چان صعب عليه افهم كل كلام الكتب لاني بعمر 15 او 16 ، بس بلشت اكوّن بعض الافكار
رحت ابحث عن كتب المُلحدين ، چنت اكتب بالگوگل كتب الالحاد ما چان تطلعلي نتائج باللغة العربية ، بس ظهرلي شخص مصري اسمه (احمد حرقان) و كذلك شخص مصري اسمه (جمال كابريال) ماعدهم كتب ولكن مقالات و مقابلات ، بلشت اسمع منهم ما اقتنعت بكلامهم بس كذلك صار عندي رد عكسي و بلشت اشوف الاسلام اكثر تسامح وانهم متخذين مواقف شخصية من الاديان
هنا بلشت اتعمق اكثر اريد اشفي فضولي ، الاسلاميين ما گدروا يقنعوني كلش بسبب تعصبهم بس كتب محمد باقر الصدر بلشت اشوفها اقرب للمنطقية ، ما احب اسلوب انك اذا تسوي هيچ راح تكون انسان صالح و اذا تسوي هيچ راح تكون كافر و تُحرق ، لو لاحظتوا ان الكتب الي قراتهم مو كلش مختصات بقضية اثبات وجود خالق ، وكنت متعمد اقرا هيچ اريد اشوف افكار الطرفين عن المواضيع العامة قبل الغوص بـ اسباب بحثي
استمريت لمدة كم سنة ، لاحظت خلالها ان الملحد (العربي) دائما يحاول يظهر الحاده وتلگاه بكل نقاش يحاول يسفه من فكرة وجود الله و فكرة الاديان ، عكس الملحد الغربي الي اصلا مو مهتم يناقشك بفكرك بل يحترم عقيدتك ، بس هو بالنهاية ما يؤمن بيها ، حسيت ان مُلحدين العرب اتخذوا من الالحاد وسيلة حتى يعبرون بيها عن سخطهم على المعيشة او رفضهم لواقعهم الاجتماعي ، ما نابع دائماً من بحث و ادراك ، تشوفه بسرعة يُستفز و يبدا يشتم و يتهجم ، ما اگول هل شيء ما موجود بـ الاسلاميين (انه يتهجمون ع ملحدين) بس حسب ملاحظتي اقل من الطرف الثاني بشكل نسبي
الخلاصة : گدرت اوصل الى قناعة ، الايمان بالله مو شيء علمي ، يعني هو مو رياضيات و اكو معادلة من خلال حساب الارقام نگدر نوصل لرقم ينهي الجدل ، الايمان هو شيء عاطفي بـ امتياز ، روحي غير ملموس ولكنهُ محسوس و يدركه قلبك ، البشر في طبيعتهم حسب تصنيف سلم ماسلو الهرمي يگول اول الاحتياجات هو الشعور بـ الامان ، الامان والسلام الروحي ما تجي عندك الا من تحس انك تحت رعاية منْ هو اقوى منك ، تحب تحس دائماً مهما وقعت بمشاكل اكو قوة اعجازية ممكن تيسرلك امرك وتخلصك من هذه المشكلة ، مثل فكرة وجود نور في آخر النفق ، احياناً ما تبصره عينك بس قلبك دائماً مؤمن بوجود هذا النور ، الله فكرة موجودة في قلوبنا ، انوجدت حتى عند الانسان القديم ، اخترع الديانات (قبل السماوية) للتقرب لله ، الله متواجد في فطرة الانسان ، ان كنت تؤمن بهِ هنيئاً لك ، و ان كنتَ لا تؤمن فـ انت لستَ عدوي .......
رد مع اقتباس
المشاركة الأصلية كتبت بواسطة انسان ثاني
