هنا

[انسان ثاني]

شوف كل انسان يبحث عن الجمال بطريقته الخاصة ، اكو واحد يحب يلبس ملابس حلوة ، اكو واحد يحب يسوي تسريحة معينة ، اكو بنية تحب تنفخ شفايفها لو تسوي نحت ، كل واحد يشوف الجمال من منظور خاص بي ، بس تره صدگني مو شرط مسويه حتى يعجبك او يعجب الجنس الآخر
اذا شفت شي حلو لا تستكثرها و گول عنه حلو تره مراح يقلل من قيمتك ، لا تبقى تدور عيوب والله هذه بزود عمليات التجميل لو الله يرحم ايام زمان ، يا اخي ليش تحاربهم انت شخصران ! ع اقل بذلوا مجهود حتى يوصلون للي وصلوله

للعلم كلشي من حولك بالحياة لازم يخضع لقوانين الجمال حتى نيتشة يگول

اذا قتلت صرصوراً فـ انت بطل
و اذا قتلت فراشة انت شرير
للأخلاق معايير جمالية

[انسان ثاني]

قبل كم سنة چنه بالنجف طالعين بمزرعة ع شط الكوفة ، نشوي سمچ للغدة والجو حار ، اصدقائي نزلوا سبحوا بالفرات و چلبولي انزل ويانه ، فـ تراهنه نعبر للجانب الثاني اني و واحد منهم ، طبعاً اني واثق من نفسي لاني سباح من طفولتي ما اتذكر شوكت تعلمت بس يعني وعيت للدنيا واحنه عدنا اشتراك بنادي العلوية و اسبح وابد ما تركت السباحة لحد هذا اليوم
المهم نزلنه و سبحنه بشكل مائل حتى لا نعاند الروج لان اذا تسبح بشكل مستقيم بالنهر راح تتعب ويجرك الروج ، المهم وصلت تقريبا لربع المسافة حسيت روحي كلش كلش تعبت وگوه اجر النفس ، فكرت بيني وبين نفسي شوف التدخين شسوه بيك !

بس تحاملت ع نفسي و وصلت تقريباً للنص وفجأة تشنجت رجلي و ما گدرت اكمل حاولت ما اقاوم الروج و اطوف نفسي حتى اوصل للجرف

اتذكر شعوري بوكتها بالخذلان ، شگد حزت بنفسي من جسمي خذلني ، شگد تنقهر من تكون واثق بنفسك انك متميز كلش بهذا الشيء بس تنصدم من تشوف شخص احسن منك

من يومها واني اكثر واقعية ، ولحد الان من احد يگلي تعال نتسابق بالسباحة حتى لو بمسبح هم ما اقبل ، اگله لا نسبح للونسة ما اريد ارهق جسمي


القناعة و الواقعية تجنبك هواي صدمات ، الي ذكرته مثال بسيط كلش

[انسان ثاني]

قراءة نقدية في سيرة
السيد محمد محمد صادق الصدر
مُحيي الحوزة الناطقة
الصدر الثاني
الشهيد الثاني


اتمنى ان يتسع قلب الاخوة الصدريين لما سوف اطرحهُ هُنا


يتبع......

[انسان ثاني]

ولد السيد وترعرع في محافظة النجف الاشرف ، من مواليد سنة 1943 ، كان تلميذ السيد محمد باقر الصدر (الشهيد الاول)
اعتُقل بعد استشهاد الصدر الاول و يُقال من داخل المجتمع الحوزوي انه ادلى بـ اعترافات ادت لأعدام اكثر من شخصية دينية حينها و بعدها اخرج من المُعتقل و وضع تحت الاقامة الجبرية في منزله لغاية سنة 1992 لا توجد اي تطورات مهمه في حياته سوى انه اعلن اجتهاده


نجي للقصة من طرف ثاني ، بلشت الحكومة العراقية في خطة تعريق المرجعية الدينية في النجف من خلال تنصيب مرجع عراقي ، ودعمه ليتسيد الساحة المرجعية ، هذه الخطة وضعت في الثمانينات ، اول شخص تمت مفاتحته الشيخ كاشف الغطاء و رفض هذا الامر قطعا ، بعدها في منتصف الثمانينات تمت مفاتحة السيد البكاء و رفض الامر كذلك ، استغربت الدولة ليش هذا الرفض و الاصرار



يتبع.....

[انسان ثاني]

حتى جاء الجواب من السيد الخرسان من فاتحوه بنفس الموضوع ، گللهم مستحيل هذا الامر يتم لان انتوا قتلتوا كل طلبتنا ، المرجع ما يصير مرجع اذا ما عنده اعتراف من اقرانه بـ اعلميته ، و عنصر ثاني وهو مهم انه عنده طلبه يدعون الناس لتقليده وانتوا گاعد تقتلون كل طلبتي العراقين وتعتقلوهم بينما الاجانب ماتگدرون تسولهم شيء بسبب سفاراتهم تحميهم ولهذا تشوفون كل المراجع اجانب

الدولة اخذت هذا الانتقاد و حاولت تصحح سياستها ، بلشوا يدخلون طلاب للحوزة هم بالاصل مخبرين في الامن ، خلوهم يتغلغلون داخل اروقة الحوزة و يصيرون جناح عراقي مؤثر في سياسات المستقبل


بعد انتفاضة 1991 تمت مفاتحة السيد محمد محمد صادق الصدر بهذا المشروع (تعريق المرجعية) ، وافق على الفكرة و رحب بيها كلش



يتبع.......

[انسان ثاني]

في وقتها تكلم معاه السيد البكاء ، گله سيدنا تريث في الامر الموضوع خطر جداًكان رد الصدر
سيدنا صدام انطاني السچينة الي راح اذبحه بيها شلون تريدني اتريث !


كان هذا اعتقاده

طبعا واجهته مشكلة بالنسبة للتصدي للمرجعية انه ماعنده اي اعتراف من اقرانه (السيستاني او النجفي او الحكيم او الفياض...... الخ) ، احد اهم نقاط الاعتراض عليه هو القطع باليقين
بمعنى هو يفترض شيء و على اساسه يتوقع نتيجة معينة ، هنا راح يقطع بالنتيجة و اي شي خلاف هذه النتيجة هو خروج عن الدين

لكن عنده طلبه هم الي ذكرناهم سابقا بـ عملاء الامن ، هم الي بلشوا يشتغلون اعلاميا حتى يجيبوله اتباع ومقلدين ، طبعا حالياً هذولة صاروا مراجع مع العلم تاريخهم معروف اذكر اسم واحد منهم الي هو الشيخ الصرخي الي فيما بعد وبقدرة قادر صار السيد الصرخي هههههه



يتبع......

[انسان ثاني]

المجتمع الحوزوي في النجف كان دائما مقتصر على الطبقة المثقفة النخبوية ، وهذه محتكرة تماما
لذلك حاول السيد الصدر استهداف فئة جديدة معدمة من الفقراء او البعيدين عن الدين اصلاً ، من خلال محاولة هدايتهم وتعريفهم بالشريعة ، نگدر نگول عمل عمل دعوي اكثر ما هو عمل اكاديمي ، طبعا مع دعم الدولة اله بكل الوسائل

الى ان تم تسليمه ملف الطلبة المقيمين ، ونقل صلاحية منح الاقامة من وزير الداخلية الى السيد الصدر ، هو شخصياً كان يمنح الاقامات و يسفر الطلبة غير المرغوب بهم و كان يوقع في المعاملات الرسمية بـ اسم (ولي امر المسلمين) ، وهذا المنصب الفخري الي كان يحب ان يسبق اسمه دائما

هامش/ من راسل السيد علي خامنائي كتب في الرسالة (الى ولي امر المسلمين) ، وهذا يعني انه لا يختلف مع فكرة ولاية الفقيه وانما يؤمن بولاية الفقية الجزئية وليست الكلية



يتبع......

[انسان ثاني]

و بلشت تصير عنده قاعدة جماهيرية في الاوساط الاقل ثقافة ، حتى سُمي في وسط مُحبيه بـ مرجع الفقراء ، و سُمي بالجانب الاخر مرجع المعدان
في سنة 1996 سطع اسمه جدا في الاوساط الحوزوية و بلش يحكم سيطرته على الحوزة العلمية لكن كان مرفوض من جميع المراجع الاخرين لذلك كان يكن عداء اتجاههم لانهم رفضوا الاعتراف بي ، في اواخر سنة 1997 او بداية 1998 دعى الى اقامة صلاة الجمعة ، و چانت هاي خطوة غير مسبوقة ان يظهر المرجع اسبوعياً في مكان عام ويلقي خطبة

تلقى دعم كبير من الدولة بحيث الحكومة چانت ترسل سيارات الباص و (الريم) لكل المحافظات الشعبية و ينادون الناس لأخذهم مجانا لصلاة الجمعة وترجيعهم لمنازلهم ، من بلشت تستمر الخطب بلش السيد يخرج خارج النطاق المرسوم اله ، بلش يمس الدولة وينتقد بشكل علني وصريح

حتى جاء قرار تصفيته و تم اغتياله واثنين من ابناءه في سنة 1999 من قبل نظام المقبور صدام



يتبع......

[انسان ثاني]

اثار مرجعيته بعد وفاته ، انه تغلغل جهاز الامن و المخابرات بداخل الحوزة بسبب طلبة السيد الصدر و بلشت تخرج من بينهم الحركات المهدوية و اصبح تحريف كبير لفكرة المرجعية
حالياً نشوف انه اكو هواي من اتباعه يدعون التدين وهم سارقين المال العام ، مشكلة السيد انه اصبح باب لدخول المنتفعين للمرجعية واختار الصدام مع صدام في الوقت الخطأ

كان يگدر يستغل شعبيته ضد صدام بشكل آخر لكنه تسرع جداً

رحمه الله و اعاننا على الجهلة من اتباعه


انتهى.....

[انسان ثاني]

مهما اسودت الدنيا بعينك
تركت شغلك ، توفى اقرب الاشخاص الك ، تركك حبيبك ، اي مصيبة تحل عليك ، لا تفقد الامل بالحياة ، لتخلي الاحباط يدگ بابك لان اذا اندلك راح يكون صديق السوء الي يقودك بيده للأنتحار ، من اعظم ما كُتب


الخائب الذي القى بنفسه الى الشارع من شقة في الطابق العاشر واثناء سقوطه راح يرى عبر النوافذ , حيوانات جيرانه الخاصة , المآسي المنزلية , علاقات الحب السرية , لحظات السعادة الخاطفة التي لم تصله اخبارها مطلقاً , بحيث انه في اللحظة التي تهشم فيها رأسه على رصيف الشارع كان قد غير نظرته للعالم كلياً وكان قد اقتنع بأن تلك الحياة التي هجرها الى الأبد عن طريق الباب الخاطئ , كانت تستحق ان تُعاش

غابرييل غارسيا ماركيز