هنا

[فـرح]

انتي هيچ دتشترين عداوتي ترا

اشتروا ذمتي
وعدوني بمنصب وفلوس

اذا مبلغ يسوى اني بياعه

[انسان ثاني]

اذا مبلغ يسوى اني بياعه

[فـرح]

هههههههههه هو ده

[انسان ثاني]

خنسولفلكم عن عشق او زهراء العبيدي

زهراء شابة بصراوية عمرها نهاية العشرينات ، ما عندي علم شنو دارسة او غالباً چنت اعرف ونسيت خخخخ ، من اول دخولها للمنتدى وهي نشطة بقسم الصوتيات و هو قسم فرعي بالدرر نگدر نگول اله استقلاليته ، ما شاء الله عليها الها واهس چبير بهل موضوع و چانت تنشر قصائد حسينية بكثرة ، بعدها بفترة الادارة لاحظت مجهودها (اتوقع سوزان) و قرروا يصعدوها من مشرفة الى مراقبة عامة و لكن خصصوا الها شيء واحد حتى تركز عليه بلا ما تتشتت و كان قسم الصوتيات ، و بصراحة خلت هذا القسم من اقوى الاقسام بجلب الزوار ، ابدعت في عملها


ايجابياتها ، تفانيها بالعمل و خبرتها في تحويل الصيغ الصوتية ، ولي فهمته من اول دخولها هي تستخدم الموبايل فقط معناها الشغل يكون شوي اصعب من اللابتوب ، مؤدبة بالتعامل مع الاخرين و ابد ما اذت احد في استخدام صلاحياتها

سلبياتها هم نگدر نگول مثل اغلب البنات وهي المزاجية و التقلب ، سمعت انها مغرورة بس الصراحة اني ماشفت هل شي بيها ، مُنعزلة جداً وما تحب تتعامل مع الاعضاء تحسها (غير اجتماعية) ، سمعت من البنات انها بارعة في كيد النساء هههه ما ادري هل شي صح او لا (هو اصلاً شنو كيد النساء!)


زهراء چانت من صديقاتي المقربات في وقت ما و چنه نحچي هوايه بس فجأة اختفت و بعد فترة رجعت و گالت اني تزوجت وصار عندي طفلة (الله يحفظها) و بعدها هم رجعت اختفت و حالياً تتواجد بس ما اعرف ان كانت نشطة او لا ، اعتقد مسؤوليات البيت اخذتها من الدرر بس الاكيد انه اكو ناس يحبوها هنا بدليل انطلب مني اسولف عنها اكثر من مرة (كلهم ولد شمسويه بيهم اعترفي هع) ، بالنهاية صديقتي العتيگة اتمنى تكونين سعيدة بحياتچ و اختياراتج و تأكدي دائماً مكانچ موجود بالدُرر

[آمــالــ]

طريقتك بوصف الأشخاص حلوه

[انسان ثاني]

طريقتك بوصف الأشخاص حلوه

شكراً درر

[انسان ثاني]

خنسولفلكم عن محمد صبيح

محمد صبيح ، بغدادي من مدينة الثورة ، اربعيني ، كاتب و اديب يشهدله اصحاب الاختصاص بالمنتدى ، اعزب حالياً ، يشتغل بمجال النت و الاتصالات ، انسان هاديء الطباع محبوب من كل محيطه ، مايحب يدخل صراعات و دائما يلتزم الصمت و يتابع الاحداث ، طبعاً منطقته معروفة بـ انتمائها السياسي للتيار الصدري لكن هو من القلائل الي ماعنده اي ميول سياسية للتيار ، محمد شخص مُعتدل بكل التوجها

ايجابياته ، اسلوبه الرائع و المثقف و المحترم بالحوار يخليك تحبه و تحترمه ، كاتب رائع يسحرك بقراءة نصوصه ، معتني بمظهره الجسدي (شاب يموت) ، اريحي بالتعامل و ممكن تصير صديقه من اول محادثة وياه ، يملك حس الفكاهة (تره محمد حشاش خخخ) ، مواقفه حلوة مع اصدقاءه يتواصل و يتصل خاصة بالشدائد وهذا شي حصل معي شخصياً ومع غيري

سلبياته ، برشلوني قافل و المشكلة اراءه مال واحد متابع برشلونة من جيل 2008 ، بس صارلي فد اربع سنين ما سامع حسه خخخخ ، ما عنده احترام للوقت ابداً (فد شويه حسولفلكم ليش) ، مشرف كسول جداً ما تشوفله نشاط في قسمه او بصراحة هو عضو كسول جداً تشوفه اون لاين بس مايشارك يگضيها همسات ^_*


ايييي شسولفلكم ع محمد وشون شلع گلبي ببداية تعارفنا ، چان عندي موضوع مايك المنتدى و ما اعرف كل الاعضاء فـ اغرد بهمس الله يذكرها بالخير گالت محمد صبيح عنده اسلوب حلو لازم تستضيفه ، رحتله و حچيت وياه و قبل ، المفروض الاستضافة تستمر لمدة يومين فقط ، العينتين كتبله مشاركة و اختفى يومين اني شسويت كتبتله شكرا الك واعتذر للقراء بسبب اعتذار محمد صبيح عن التكملة(هو ما اعتذر بس هاي گدعنه مني) ، وراها هو زعل شون اسوي وياه هل شغلة المهم راضيته وهاي كلها بيناتنه رسميات ماكو اي صداقة ، استضفته و گتله محمد رجاءً التزم باليومين ، وچان يجرها لمدة شهر و شويه الا خبلني ، الموضوع راح انسى و قل تفاعله من وره محمد شلع گلبي ، بحيث بهل فترة صرنا اصدقاء و سوالف و واتصالات وهو بعده ماخاتم ، وياريت لو كاتب هوايه كلما تحچي وياه يكلك والله هسه ادخل و اكتب ويختفي اسبوع


ما انسالكياها الله ينتقم منك خخخخخ

[انسان ثاني]

المليشيات و الفساد


قبل كم يوم چنه طالعين اني و صديقي ، دا نرجع للبيت ساعة 3 ونصف بليل ، بساحة الواثق ، اكو ملهى ليلي صايرة يمه لمة ، صديقي عنده فضول مثل فضول العجوز بالبيت تريد تفتهم كلشي ، بسرعة طبگ السيارة ونزل يريد يشوف شنو العركة ، لگينه ناس مصاليخ و سكارة دا يتعاركون طالعين من الملهى ، سبب العركة ع بنية ، واحد يصيح اني بالعصائب و اليوم اعزلها للكرادة و الثاني يصيح اني بفلان فصيل (نسيت اسمه والله) و يتعاركون و كفرهم وفشارهم واصل لجسر الربيعي ، بالعباس اشيلك و ذاك والحسين اسحلك


لهناك واجت سيارة النجدة ، ليش بقى واحد منهم ؟ مثل الجريذية اختفوا بين الشوارع الفرعية راحوا يركضون


هنا يبينلنه انه هذولة كلهم بوخات و نفخة بس حچي وساعة الصدگ ما يسون شي ، استخدموا اسم الحشد بـ اماكن ما تليق بتاريخ و تضحيات الشباب الي راحوا


لو بس يجينه سياسي محترم و يعرف يلم هل زبايل من شوارع بغداد ، راح تصير بغداد جنة (قبل لا تتعمر اصلا)





هامش / صديقي الفضولي لطش بنصهم و يكلهم يمعودين صلوا ع نبي ادري شوكت لحكتوا تشربون و تسكرون وتتعاركون تره هي الحفلة تبلش بـ 1 شكد راسكم خفيف شلقضية (غير رادو يدفنوه)

[انسان ثاني]

طبعاً راح اضيف فقرة (خنسولفلكم) على السياسيين او رجال الدين العراقيين او العرب

اكو منهم اني اعرفهم من خلال معارف عائلتي والاغلب اني قاري عنهم ، فـ حلو اشارككم هذه المعلومات عنهم ، و نسوي مساحة سياسية بهل مدونة

[افول]

مدونة جميلة شكرا جزيلا
متابعة