وصلت … جاي اعيش بأخر ايامي
و اهي شمرة عصى وبيدي ادفن احلامي

هلي عذروني اذا قصرت يوم بشي
سراب ايام عمري شتنفع الضامي!!

هلي و الساتر الله من الهوى مخنوگ
و أحس بالخنگه وصلت لأخر اعظامي

هاي اخر قصيده وتخلص الاوراق
و اخر بيت اكتبه و تنتهي اقلامي

كخيط العنكبوت انسحب من انسج
جاي اكتب وصيتي و الدمع عرج

شويه تأخر استأذنت عزرائيل
حتى اكتب امنيتي اتشاهدت و الهج

قبل لا روحي تطلع گلت ابيع الروح
و اخذ امي بيدي لمكه حتى تحج

ولكن موتي مستعجل عليه اليوم
ميت لا محاله و الامر محتوم

بعد ساعه و يطش الخبر بالقطاع
وتندگ قطعه سوده الشاعر المرحوم

و انه اوگف و اعاين و اضحك بلا صوت
على شكم شخص يبچي بموتي و مصدوم

نفسهم من جنت عايش ولا يسألون
و لهسه شكم جرح منهم بعد ملجوم

واحد صاح هذا شعنده ماعنده
واحد گال ضَمهن جوه المخده

بثواب المات (سائل)گال اريد فلوس
واحد رد علي ماعندي ابد خرده

و واحد نسى اسمي بسرعه و توازه
گال استعجلوا شيلوها الجنازه

نسوا مادخلوني ابيتي بالتشييع
ولا صوت اللطم يتبع الجنازه

ما خلوا خواتي تكسر التابوت
ولا خواني شگوا ثوبهم بعدي

جانت ليله ضلمه و خايف من الجاي
بس واحد يگلي رحله وتعدي

بسرعه تفرقوا من خلص التلقين
واباوع وحدي باقي و عالترب خدي

عندي ذنوب كثره و يرهب الجلاد
و شيخلصني اذا حطوا بأيدي اصفاد

وي روحي اسولف خايف و مرعوب
و أزداد القلق من ايدي گمت انگاد

قريت الفاتحه لأم البنين بصوت
و گمت بالاوعي اصرخ يبو السجاد

و أجاني وصاح ابشر و الگلب يغلي
و لزم دفتر اعمالي يضيف و يخلي

بضيافة فاطمه گلالي ابد لتخاف
من جنت بمحرم شعر تكتبلي

باجر جمعه وشلون الصلاه تنعاف
گال هنا جميع امواتنا تصلي

الحِسن للناس حصل من الاحسان
وهذن دمعاتي فدوه مني لحسين
يسألوني شتحصل من الحسين؟
لحم جتافي من ابن الزجيه











سيف العبادي